کابل (پژواک، ۲۴ زمری ۱۴۰۴): د ا.ا مشرتابه د زمري ۲۴مې په مناسبت پیغام کې ویلي، افغانستان اوس مهال د یوه شرعي نظام خاوند دی او له ټولو چارواکو یې غوښتي چې د خلکو د سوکالۍ او ارامۍ لپاره کوښښ وکړي او نور دې وزیران او کابینه د سرپرست کلمه نه استعمالوي.
اسلامي امارت د ۱۴۰۰ کال د زمري په ۲۴مه بیا واک ترلاسه کړ؛ دغه ورځ هر کال د هېواد په مرکز او ولایتونو کې نمانځل کېږي.
د اسلامي امارت مشرتابه د همدې ورځې په مناسبت په یوه خپور شوي پیغام کې ویلي: «د عظیمې فتحې او د امریکا او د هغوی د متحدینو له اشغال څخه د افغانستان د فتحې څلورم کال پوره شو او په افغانستان کې د سپېڅلي شرعي نظام د راوستلو لپاره افغانانو تقريباً له پنځوسو کلونو څخه خورا ډېر ډېر تکالیف وزغمل او ډېرې زیاتې قربانۍ یې ورکړې. افغانستان د اشغال له ختمېدو وروسته د یوه سپېڅلي شرعي نظام خاوند شو.»
هغه ویلي، اوسمهال په افغانستان کې سراسري امن راغلی او د شرعي قوانینو په رڼا کې له فساد، ظلم، غصب، مخدره موادو، غلا، چور او تالان څخه وژغورل شول، د افغانستان د ابادۍ او بیارغېدو لپاره ښه زمینه مساعده شوه او افغانان له ژبني، قومي، سمتي، ګوندي او نورو اختلافاتو څخه نجات پیدا کړ.
ده ویلي: «دا لوی الهي انعامات دي چې باید زموږ خلک یې هېر نه کړي او د فتحې ورځې د یادونې پر مهال دې د الله تعالی ډېر شکر ادا کړي، تر څو دا نعمتونه نور هم زیات شي او که خدای مه کړه د نعمتونو شکر ادا نه کړو، ناشكري يې وکړو، بیا به د الله جلّ جلاله پر سختو عذابونو مبتلا شو.»
د اسلامي امارت مشر دغه راز ویلي: «ټولو مسوولینو ته مو جدي هدایت دی چې د خپل شرعي نظام او مسلمانانو په خدمت کې واوسي او د خلکو د سوکالۍ او ارامۍ لپاره کوښښ وکړي او د اسلامي امارت ټول وزیران او کابینه دې د سرپرست کلمه نه استعمالوي.»
ده دغه راز د اسلامي امارت له مسوولینو غوښتي چې د یتیمانو پالنې او ساتنې ته پام وکړي.
GET IN TOUCH
NEWSLETTER
SUGGEST A STORY
PAJHWOK MOBILE APP