ختيځ کې د زلزلې د مړو شمېر ۱۱۲۴ او د ټپيانو ۳۲۵۱  ته ورسېد

کابل (پژواک، ۱۱ وږی ۱۴۰۴): د افغاني سرې مياشتې ټولنه وايي، د هېواد په ختیځ کې د وړمې شپې په مرګونې زلزله کې د مړه شوو کسانو شمېر ۱۱۲۴ او د ټپيانو ۳۲۵۱ ته رسېدلی او له اته زره ډېر کورونه ویجاړ شوي دي.

افغاني سرې مياشتې ټولنې دغه څرګندونې نن له غرمې وروسته شاوخوا یوه بجه په یوه خبرپاڼه کې کړې دي. دا په داسې حال کې ده چې نن هم تر اوسه په سيمه کې د ژغورنې عملیات روان دي.

دغه زلزله چې وړمه شپه شاوخوا ۱۲ بجې وشوه، د امریکا د ځمک‌پېژندنې ادارې د ريښتر په کچه ٦ درجې ښودلې ده.