کابل (پژواک، ۲۴ تله ۱۴۰۴): د اطلاعاتو او فرهنګ وزارت د پاکستان د تېرې ورځې په بریدونو کې د دوو افغان خبریالانو د شهادت په اړه خواخواږي ښودلې او ویلي یې دي چې خبریالان د ولس رسا غږ دي، امنیت او مصؤنيت ته یې باید جدي پام وشي.
د اطلاعاتو او فرهنګ وزارت په خبرپاڼه کې راغلي چې دغه وزارت: «د ملي تلویزیون د دوه متعهدو او فداکارو خبریالانو، هر یو عبدالغفور عابد او انجنیر عبدالظاهر صافي شهادت له امله چې د اسلامي امارت د ځواکونو او د پاکستان د پوځ تر منځ د وروستیو جګړو څخه د راپور جوړولو پر مهال د جنایتکارانه بریدونو په ترڅ کې شهیدان شوي ژوره خواشيني او د دوی درنو کورنیو، رسنیزو همکارانو او د مطبوعاتي ډګر ټولو غړو ته تسلیت او همدردي وړاندې کوي.»
د راپورونو له مخې، د پکتیا ولایت د ملي تلویزیون پر خبریال، عبدالغفور عابد د دغه ولایت د ځاځي میدان ولسوالۍ اړوند سیمه کې برید شوی و او د هغه بل همکار تواب ارمان هم په دغه برید کې ټپی شوی و خو د اطلاعاتو وزارت په خبرپاڼه کې نه دي راغلي چې پر د انجنیر عبدالظاهر چېرته برید شوی و.
د اطلاعاتو او فرهنګ وزارت ویلی، د خبریالانو پر وړاندې هر ډول بریدونه، هدف ګرځول او تاوتریخوالی په کلکه غندي او «دا برید د دښمن د نهايي ضعف نښه او ستر جنایت بولي.»
سرچینې زیاته کړې، خبریالان د ولس رسا غږ دي، او هر ډول تعرض یا سپکاوی يې د اسلامي، انساني او اخلاقي اصولو څخه سرغړونه ده.
یاد وزارت غوښتنه کړې چې د خبریالانو امنیت او مصؤنيت ته باید په جدي ډول پام وشي، څو د ورته غمجنو او دردناکو پېښو د تکرار مخه ونیول شي.
GET IN TOUCH
NEWSLETTER
SUGGEST A STORY
PAJHWOK MOBILE APP