پروان کې د ترافیکي پېښې له امله څلورو کسانو ژوند له لاسه ورکړی

چاریکار (پژواک، ۱۴ لړم ۱۴۰۴): د پروان ولایت د سیاګرد ولسوالۍ په چهارده سیمه کې د یوې ترافیکي پېښې له امله څلورو کسانو ژوند له لاسه وکړی او دوه نور ټپیان شوي دي.

د پروان د امنیې قوماندانۍ ویاند فضل‌الرحیم مسکین‌یار پژواک خبري اژانس ته وویل چې نن سهار یوه باروړونکي او کرولا موټرو د دغه ولایت د سیاګرد ولسوالۍ د غوربند په «چهارده» سیمه کې ټکر کړی دی.

هغه زیاته کړه چې په دې پیښه کې په کرولا موټر کې د ښځو او ماشومانو په ګډون څلورو کسانو ژوند له لاسه ورکړی او دوه نور ټپیان شوي دي.

د هغه په خبره، ټپيان لومړی د غوربند کلينيک او وروسته د پروان ولايت ملکي روغتون ته لېږدول شوي دي.

د امنیې قوماندانۍ ویاند وویل چې دواړه موټرچلوونکي د ترافیکو ریاست په توقیف کې دي او د لومړنیو څېړنو پر بنسټ، د کرولا موټر د چلوونکي بې‌احتیاطي د پېښې لامل شوې ده.