د سرحدونو وزیر او تاجکستاني پلاوي د ګډ سرحد د تثبیت او امنیت په اړه خبرې کړې

کابل (پژواک، ۲۶ لړم ۱۴۰۴): د افغانستان د سرحدونو، قومونو او قبایلو چارو وزیر کابل کې له تاجکستاني پلاوي سره لیدلي او دواړو لورو د امنیت، د اړیکو پراختیا، سرحدي ستونزو او د ګډ سرحد د تثبیت په اړه خبرې کړې دي.

د سرحدونو، قومونو او قبایلو چارو وزارت د خبرپاڼې له مخې، د دغه وزارت وزیر او د سرحدونو د تثبیت چارو کمېسیون مشر ملا نورالله نوري د یوه پلاوي په مشرۍ د تاجکستان هیواد له راغلي پلاوي سره - چې ملتیا یې د دې هېواد د امنیت دولتي کمېټې د سرحدي ځواکونو لومړي مرستیال او د تاجکستاني پلاوي مشر میرزا زاده عبدالواحد کوله - وکتل.

خبرپاڼه کې راغلي، په یاده لیدنه کې د دواړو هېوادونو د پلاوو تر منځ د امنیت، د اړیکو پراختیا، سرحدي ستونزو او د ګډ سرحد د تثبیت په اړه خبرې وشوې.

نوري ویلي: «دا د خوښۍ ځای دی چې افغانستان او تاجکستان د اړیکو په برخه کې مثبت ګامونه اخلي، د افغانستان اسلامي امارت هڅه کوي چې د نړۍ له ټولو هېوادونو سره اقتصادي، سیاسي او دوستانه اړیکې ولري.»

هغه ویلي، اسلامي امارت د انساني او مخدره توکو له قاچاق څخه په جدي توګه مخنیوی کوي او په دې اړه د مشرتابه له لوري فرمانونه هم صادر شوي دي.

نوري دغه‌راز ویلي، د افغانستان او تاجکستان د ګډ سرحد تثبیت به د دواړو هېوادونو د ثبات او امنیت په برخه کې ګټور رول ولوبوي.

د یاد وزارت د معلوماتو له مخې، د راغلي پلاوي په استازیتوب عبدالواحد ویلي، افغانستان او تاجکستان ژبنیز، دیني او ګډ مشترکات لري او د دواړو هېوادونو ولسونه د امن غوښتونکي دي.

هغه ویلي،‎ تاجکستان ژمن دی چې له افغانستان سره په اقتصادي او نورو برخو کې اړیکې پراخه کړي.

ده هیله څرګند کړې چې تاجکستان او افغانستان به په ګډه د سرحد په اوږدو کې شته ستونزې د تفاهم له مخې حل کړي او په دې برخه کې به خپلو مرستو او همکاریو ته دوام ورکړي.