فېروزکوه (پژواک، ۲۲ لېندۍ ۱۴۰۴): په غور کې سیمهییزې سرچینې وايي د دغه ولایت په ۷ ولسوالیو کې د ۱۶۴ کیلومتره کیلوالي سړکونو د جوړولو او بیارغونې چارې پیل شوې.
د غور د کلیو بیارغونې او پراختیا ریاست د رسنیو د دفتر مسوول ذبیحالله غوثيزاده پژواک خبري اژانس ته وویل چې نن د دغه ولایت په چهارسده، الفاروق، دولینه، تولک، دولتیار، شهرک او ساغر ولسوالیو کې د ۱۶۴ کیلومتره کلیوالي سړکونو جوړولو چارې پیل شوې.
هغه زیاته کړه، دغه پروژې له یاد ریاست سره په همغږۍ د خوړو د نړۍوالو پرواګرام (WFP ) په مالي او د CRDSA موسسې په تخنیکي همکاری پلې کېږي.
د هغه په خبره: «دغه پروژې د «کار په بدل کې غذا» په چوکاټ کې کلیوالي خلکو ته د لنډې مودې لپاره د کاري فرصتونو برابرولو په موخه پلې کېږي چې کارګرانو ته د کار په بدل د خوړو د نړۍوال پروګرام له لارې اوړه، غوړي، دالنخود او مالګه وېشل کېږي.»
هغه وايي چې د یادو پروژو له ډلې ۸۵ کیلومتره سړکونه د غور په ساغر ولسوالۍ کې جوړیږي چې په بشپړېدو سره به یې د دغه ولایت د شهرک، تولک، تیورې او ساغر ولسوالیو موصلاتي لارې سره ونښلول شي او د خلکو د تګراتګ ستونزې به تر ډېره حل شي.
دغه راز، د یادو ولسوالیو اوسېدونکي د دغو پروژو له پلي کېدو هرکلی کوي او وايي چې په بشپړېدو سره به یې خلکو ته ډېرې اسانتیاوې برابرې شي.
GET IN TOUCH
NEWSLETTER
SUGGEST A STORY
PAJHWOK MOBILE APP