افغان پلاوي له ایراني لوري سره د خوراکي توکو او درملو د وارداتو بهیر پر اسانتیا خبرې کړې دي

کابل (پژواک، ۲۶ لېندۍ ۱۴۰۴): د افغانستان د عامې روغتیا وزارت د خوړو او درملو مرستیال د یوه پلاوي په مشرۍ ایران ته تللی او هلته یې له ایراني چارواکو سره د افغان کارپوهانو د ظرفیت لوړونې او هېواد ته د خوړو او درملو د وارداتو بهیر د اسانتیا په اړه خبرې کړې دي.

د افغانستان د عامې روغتیا وزارت خبرپاڼه کې راغلي چې د دغه وزارت د خوړو او درملو مرستیال  مولوي حمدالله زاهد تېره ورځ د یوه پلاوي په مشرۍ ایران ته سفر وکړ.

سرچینه زیاتوي چې افغان پلاوي د ایران د روغتیا وزارت له مرستیال او د دغه هېواد د درملو او خوړو سازمان له رئیس ډاکټر مهدي پیر صالحي او مل پلاوي سره لیدنه کړې ده.

د خبرپاڼې له مخې، په دې لیدنه کې دواړو لورو د تنظیمي او تجارتي اړیکو د پیاوړتیا، د دواړو ګاونډیو هېوادونو ترمنځ د تنظیم سیسټم پیاوړتیا لپاره د تجربو شریکولو او تخنیکي همکاریو، د لاسلیک شوي تنظیمي هوکړه‌لیک عملي کولو، د افغان کارپوهانو د ظرفیت لوړونې او هېواد ته د خوړو او درملو د وارداتو بهیر د اسانتیا په اړه هر اړخیز بحث او خبرې وکړې.

د یادونې ده، له دې مخکې د ایران یوه لوړپوړي پلاوي د دوه‌ اړخیزو همکاریو او هېواد ته د خوړو او درملو د وارداتو بهیر د اسانتیا په موخه د خوړو او درملو معینیت کې له اړوندو مسوولینو سره لیدنه ترسره او خبرې اترې کړې وې.