کابل (پژواک، ۱۳ کب ۱۴۰۴): د کرنې، اوبولګولو او مالدارۍ وزارت وایي چې په کابل کې د نیالګیو اېښودو ملي کمپاین پیل شوی او راتلونکي نوي کال کې به په ټول هېواد کې نږدې ۱۹ میلیون نیالګي کېښودل شي.
د کرنې، اوبولګولو او مالدارۍ وزارت نن ویلي چې د دغه وزارت له لوري د کابل په بادامباغ کې «د نیالګیو اېښودل صدقه جاریه ده» تر شعار لاندې د نیالګیو اېښودو پسرلنی ملي کمپاین پیل شو.
په دې تړاو جوړه شوې غونډه کې د کرنې، اوبولګولو او مالدارۍ وزیر مولوي عطاءالله عمري له خلکو غوښتي چې د نیالګیو په اېښودو او پالنه کې فعاله ونډه واخلي.
هغه زیاته کړې، د وروستیو کلونو وچکالۍ او د هوا ککړتیا زیاتېدو ته په کتو، د کرنې پراختیا او د نیالګیو کېنول د هوا په پاکوالي او د اوبو سرچینو په زیاتوالي کې بنسټیز رول لري او د دولت او ولس ګډه همکاري کولای شي د هېواد په زرغونتیا او سوکالۍ کې اغېزناکه تمامه شي.
په دې غونډه کې د اقتصاد وزیر قاري دینمحمد حنیف د نیالګیو اېښودو ملي کمپاین یو بنسټیز چاپېریالي اقدام وباله او زیاته یې کړه چې باید ورته د یوې ملي پروژې په سترګه وکتل شي.
نوموړي ټینګار وکړ چې د هېواد د ودې لپاره باید کرنه او قدرتي سرچینې د پراختیايي پالیسیو په محور کې ځای ولري.
دغهراز، د کرنې وزارت د قدرتي سرچینو لوی رییس مولوي عبدالاحد خلیل ویلي، روان کال د یاد وزارت په قوریو کې نږدې ۱۱ میلیونه نیالګي تولید شوي چې د وېش لپاره چمتو دي.
هغه زیاته کړې، په غرونو او غونډیو کې پر شاوخوا ۱۴ زره هکټاره ځمکه ځنګلونه رغول شوي او ۱۱۰۰ هکټاره ځمکه د پستې، چهارمغز او جلغوزیو بڼونه هم بیارغول شوي دي.
د کرنې وزارت د معلوماتو له مخې، روان کال به په ټول هېواد کې ۱۸.۹ میلیونه نیالګي تولید او کېښودل شي.
GET IN TOUCH
NEWSLETTER
SUGGEST A STORY
PAJHWOK MOBILE APP