احمدشاه عرفانیار

قرغیزستان د روان ۲۰۲۵ کال په لومړيو دوو میاشتو کې افغانستان ته د ۱۱.۵ میلیون ډالرو په ارزښت، ۲۴.۹ میلیون لیتره نفتي توکي صادر کړي دي.

د افغانستان د چرګانو د فارم‌لرونکو ټولنه وايي چې افغان سوداګرو په دې برخه کې ۱،۵ میلیارد ډالره پانګونه کړې او هېواد د چرګ غوښې د تولید له اړخه ځان‌بسیاینې ته رسېدلی دی.

تېره اونۍ، درېیو هېوادونو له افغانستان سره نږدې ۴.۴ میلیون ډالره مرسته اعلان کړه، افغان چارواکو قطر، ایران او اوزبېکستان ته سفرونه لرل او ملګرو ملتونو د یوې نظرپوښتنې له مخې وویل چې افغانستان کې بېلابېلو برخو ته د ښځو لاسرسی محدود شوی، خو ا.ا دا څرګندونی بې‌بنسټه وبللې.

د افغانستان د کرنې، اوبو لګولو او مالدارۍ وزارت معين د پاکستان له یو شمېر سوداګرو سره د لیدنې پر مهال ویلي چې سیاست باید له سوداګرۍ او اقتصاد څخه جلا وساتل شي او د دواړو هېوادونو ترمنځ واټن رامنځته کول دواړو لوریو ته اقتصادي زیان رسوي.

د بې‌پولې خبریالانو سازمان خپل تازه راپور کې ویلي، روان کال د نړۍ په ګوټ ګوټ کې د بیان ازادي تر ټولو ډېره ځپل شوې او د ارزول شوو ۱۸۰ هېوادونو له ډلې په ۱۶۰ هېوادونو کې رسنۍ د مالي سرچینو په ترلاسه کولو کې له جدي ستونزو سره مخ دي.

د راپورونو له مخې، د غزې په البیروج سیمه کې د اسرائیلو د هوايي بریدونو له امله ۲۲ فلسطینیانو ژوند له لاسه ورکړی دی.

د ایران د بهرنیو چارو وزیر اعلان کړی چې د دغه هېواد د اټومي پروګرام په تړاو له امریکا سره د غیرمستقیمو مذاکراتو څلورم پړاو چې ټاکل شوې وه سبا د ایټالیا په پلازمېنه، روم کې ترسره شي، د تخنیکي او تدارکاتي دلایلو له امله ځنډول شوی دی.

د راپورونو له مخې، د پاکستان او هند د اړیکو تر ترینګلتیا وروسته، تېره ورځ پاکستان د افغانستان ۱۵۰ باروړونکو موټرو ته چې هند ته یې سوداګزیز توکي لېږدول، د واګه له بندره د تېرېدو اجازه ورکړې ده.

د ملګرو ملتونو د بشري مرستو د همغږۍ دفتر (اوچا) وایي، ملګرو ملتونو افغانستان کې له زیانمنېدونکو ټولنو سره د مرستو لپاره ۱۶.۶ میلیونه ډالر ځانګړي کړي دي.

د سوداګرۍ او صنعت وزارت هېواد ته د بېرته راستنېدونکو کډوالو د اقتصادي ادغام بهیر کې د اسانتیا راوستو په موخه له بېلابېلو موسسو سره د همکارۍ پنځه هوکړه‌لیکونه لاسلیک کړي چې څه باندې ۲۰ زره کسان به ترې برخمن شي.

د افغانستان بانک اعلان وکړ چې هرات کې یې د ۶۶۰ میلیون او ۷۰۰ زره افغانیو په ارزښت زاړه بانک‌نوټونه سوځولي دي.

د اطلاعاتو او فرهنګ وزارت مسوولینو د کتاب نړۍوالې ورځې نمانځغونډه کې د مطالعې فرهنګ پر ترویج ټينګار وکړ ویې ‌ویل چې زرګونه کتابونه د پردیو د فرهنګ او د هغوی د استعماري ګټو عامولو لپاره راوارد شوي دي.