احمد شاه عرفانیار

کورنيو چارو وزارت وايي، امنيتي ځواکونو په درېيو ولايتونو کې ۱۸ کسان له ۱۵زره نشه‌يي ګوليو او ۷۸ کيلوګرامه نشه‌‎يي توکو سره نيول شوي دي.

د ميدان‌وردګو عامې روغتیا ریاست وايي، تېره ورځ د دغه ولایت په ولایتي روغتون کې یوې مور څلور ماشومان زېږولي دي.

د ماليې وزارت وايي، د دغه وزارت کارکوونکو له پاکستانه په قاچاقي توګه د نږدې ۵۶ ټنه بېلابېلو توکو د راوړلو او هغه هېواد ته د ۶۵نیم ټنه زړې اوسپنې د قاچاق مخه نيولې ده.

د امریکا له ګوانتانامو زندانه خوشي شوي دوه افغانان په عمان کې له اووه کاله نظربندۍ وروسته نن هېواد ته راستانه شول.

تېره اونۍ د م.م او اروپایي ټولنې استازو له افغان چارواکو سره د دوحې راتلونکې ناستې په اړه خبرې وکړې؛ نیکولسن دغه ناسته د افغانستان او نړۍ ترمنځ د يوه مثبت پړاو پيلامه وبلله او لسو سازمانونو له م.م وغوښتل چې په یاده غونډه کې د ښځو حقونو ته لومړیتوب ورکړي.

د کابل ښار په بېلابېلو سيمو کې د څه باندې اتيا ميليون افغانيو په لګښت ټولټال تر دوه کيلومتره ډېر سړکونه قير او ګټې اخيستنې ته وسپارل شول.

د راپورونو له مخې، د امریکا اورګن ایالت کې یوې کوچنۍ الوتکې سقوط کړی چې په کې د افغانستان د مخکني هوایي ځواک درې غړي مړه شوي دي.

مولوي امیرخان متقي هرات کې د ترکمنستان بهرنیو چارو له وزیر سره په ليدنه کې د افغانستان په خاوره کې د ټاپي پروژې د لېږد پر لارو، تورغونډۍ بندر کې د رېل‌پټلۍ سټېشن پر پراختیا او د هرات د نورالجهاد برق سب‌سټېشن د ظرفیت لوړولو په اړه خبرې کړې دي.

د افغانستان د امربالمعروف او نهی‌ عن‌المنکر وزارت وايي، د اسلامي حکمونو پلي کول د الله (ج) حکم دی، نه د اسلامي امارت او هر ډول بندیزونه لګول اسلامي امارت له خپلو موخو نه شي ګرځولای.

د افغان معلولینو او زیانمنونکو ټولنه په افغانستان کې د معلولینو شمېر نږدې ۱۴ سلنه ښیي او پر ملي او نړۍوالو بنسټونو غږ کوي څو له هغوی سره اړینې مرستې وکړي.

جاپان کې د «اسپرې» په نوم د امریکا متحده ایالتونو یوه الوتکه لوېدلې او له سپرلیو یې یو کس مړ او اووه نور نادرکه دي.

افغان او ایراني چارواکو په کابل کې د ليدنې پر مهال، ایران کې د افغان ماشومانو د ښوونیز حالت پر څرنګوالي، د پوهنې په برخه کې د دوه اړخیزه تجربو پر شریکولو، رښتني ګاونډیتوب او د دوه اړخیزو مشترکو ګټو پر پاللو خبرې کړې دي.