احمد صهیب حسرت

ستره محکمه وایي، په میدان وردګو ولایت کې دوو مجرمینو او درېیو تورنو کسانو ته په عام محضر کې تعزیري سزا ورکړل شوه.

د خیبر جرګې پرېکړه کړې چې په دوو میاشتو کې دې د پاکستان پوځ او ټولې وسله‌والې ډلې د پښتونخوا له خاورې ووځي او د ډیورنډ پر کرښه دې د پخوا په څېر له پاسپورټ او ویزې پرته تګ راتګ پيل شي.

د ریاست‌الوزراء سیاسي مرستیال د بېلابېلو ولایتونو له قومي مشرانو سره په لیدنه کې ویلي، د ا.ا‎ او ولس ترمنځ د همکارۍ فضا رامنځته شوې او قومي جوړښتونه د خلکو ستونزو ته د رسېدنې برخه کې ښه همغږي رامنځته کولای شي.

د اوبو او انرژۍ وزارت وایي، د قرغیزستان او ازبکستان هېوادونو دوو شرکتونو په افغانستان کې له نوې ټکنالوجۍ په ګټې اخیستنې د برېښنا د تولید پروژ کې پانګونې ته لېوالتیا ښودلې ده.

د کانونو او پټرولیم وزارت وایي، د دغه وزارت سرپرست په کابل کې د چین له سفیر سره د دواړو هېوادونو ترمنځ د اقتصادي اړیکو د لا پراختیا، د ګډو همکاریو او د پانګونې د فرصتونو په اړه خبرې کړې دي.

د راپورونو له مخې، په خیبر کې د پښتنو قومي جرګه د پښتون ژغورنې غورځنګ د مشر منظور پښتین په وینا پیل شوه.

د افغانستان بهرنیو چارو وزارت په بلوچستان کې د سکرو کان پر ګارګرو برید – چې له امله یې د څلورو افغانانو په ګډون ۲۰ تنه وژل شوي وو – غندلی او وایي د افغانانو د جنازو د انتقال لپاره به اړینې اسانتیاووې برابرې کړي.

اسلامي امارت د روسیې فدراسیون شورا د نړۍوالو چارو د رییس له هغو څرګندونو هرکلی کړی چې ویلي يې دي، منځنۍ اسیا کې د سولې او ثبات لپاره د افغانستان له سرپرست حکومت سره خبرې اړینې دي.

د پاکستان په پلازمېنه اسلام‌اباد کې د قایداعظم پوهنتون کې د محصلینو د دوو ډلو ترمنځ نښته شوې چې له امله یې اووه کسان ټپیان شوي دي.

د سرحدونو، قومونو او قبایلو چارو وزارت وایي، په زابل ولایت کې د دوو قومونو ترمنځ شپږ کلنه دښمني پای ته ورسېده.

د چاپېریال ساتنې ملي ادارې رییس په افغانستان کې د سره صلیب فدارسیون له استازي سره له نړۍ‌والو غوښتنه کړې چې چاپېریالي موضوعات دې نه سیاسي کېږي او د څه ‌باندې ۸۰۰ میلیون ډالرو په ارزښت د دې ادارې د ۳۲ ځنډول شوو چاپېریالي پروژو کارې دې بېرته پیل شي.

د ملي دفاع وزارت وایي، د ۲۰۳ منصوري قول اردو ځواکونو د پکتیکا ولایت په برمل ولسوالۍ کې یو شمېر وسلې او مهمات نیولي دي.