نورالله ځاځی

د افغانستان د ازادو ژورنالېستانو ټولنې او کابل کې د یوه خصوصي معالجوي روغتون ترمنځ هوکړه‌لیک لاسلیک شو چې له مخې به یې خبریالانو او د هغوی د کورنیو غړو ته په ټولو تشخیصیه برخو کې له ۵۰ تر۷۰ سلنه تخفیف ورکړل شي.

د امر بالمعروف، نهې ‌عن‌المنکر او د شکایتونو اورېدلو سرپرست وزیر لغمان کې یوې غونډې ته ویلي، دغه وزارت د ښځو د ټولو شرعي حقونو ورکړې ته ژمن دی، هېڅوک حق نه‌ لري ښځې په بدو کې ورکړي او یا یې په نورو شرعي حقونو سترګې پټې کړي.

د افغانستان د مالیې وزارت وايي چې د پکتیکا ولایت ګمرک کې د برېښنا چمتو کولو لپاره د ۷،۲ میلیون افغانیو په لګښت د ۶۰ کیلو واټه په ظرفیت د لمریزې برېښنا سیسټم جوړ شو.

د افغانستان د اطلاعاتو او فرهنګ وزارت د هنر او کلتور مرستیال له یوناما غوښتي چې په ولایتونو او ولسوالیو کې د عامه کتابتونونو ودانیو جوړولو، ډیجیټل سیسټم او ګرځنده کتابخونو رامنځته کولو او د هغو د تجهیز برخو کې له دغه وزارت سره مرسته وکړي.

د اوبو او انرژۍ وزارت وایي، د کابل ولایت د سروبي ولسوالۍ اړوند د نغلو د ۱۰ میګاواټه لمریزې برېښنا پروژه د ۷.۶ میلیون امریکایي ډالرو په لګښت ګټې اخیستنې ته وسپارل شوه.

د افغانستان د اوبو او برېښنا وزارت وايي، پنجشېر کې د سیند څنډو د تحکیماتو څلور پروژې د څه باندې ۲۰ میلیون افغانیو په لګښت پرانیستل شوې.

د افغانستان ریاست‌الوزراء د ایران او پاکستان پر ګډه پوله د یو شمېر افغان کډوالو مرګ ژوبلې راپورونو په اړه د پلټنو لپاره پلاوی وتاکه.

د کورنیو چارو وزارت وایي، د اسلامي امارت د مشرتابه د فرمان له مخې او د یاد وزارت سرپرست د هدايت پر اساس، هیڅوک اجازه نه لري چې د هېواد په ښارونو کې له نمبر پلېټ او اسنادو پرته موټر او وسايط وګرځوي.

د صنعت او سوداګرۍ وزارت وايي، د روان لمریز کال په تېرو شپږو میاشتو کې له افغانستانه د ۷۷،۵ میلیون امریکايي ډالرو په ارزښت انجه او زعفران بهر ته صادر شوي دي.

د لوړو زده‌کړو وزارت وايي، د کاپیسا ولایت البیروني پوهنتون کې د یو شمېر پروژو کار پیل او د ۱۸ میليون افغانیو په لګښت د یاد پوهنتون د احاطوي دېوال په ګډون د یو شمېر نورو پروژو چارې بشپړې شوې.

د اسلامي امارت ویاند وايي چې په افغانستان کې نوی بس موټر تولید شو او له دغه بسه به په هېواد کې د ښاري خدماتو لپاره کار واخیستل شي.

د کابل ښار په ۲۰مه ناحیه کې د ۲۷،۲ میلیون افغانیو په لګښت د درېیو فرعي سړکونو د جوړولو چارې بشپړې شوې.