کابل (پژواک، ۳۰ تله ۱۴۰۳): د امر بالمعروف، نهې عنالمنکر او د شکایتونو اورېدلو سرپرست وزیر لغمان کې یوې غونډې ته ویلي، دغه وزارت د ښځو د ټولو شرعي حقونو ورکړې ته ژمن دی، هېڅوک حق نه لري ښځې په بدو کې ورکړي او یا یې په نورو شرعي حقونو سترګې پټې کړي.
د امر بالمعروف، نهې عنالمنکر او د شکایتونو اورېدلو وزارت په خبرپاڼه کې راغلي چې د دغه وزارت سرپرست شیخ محمدخالد حنفي لغمان ته تللی او هلته یې د ا.ا د مشرتابه د فرمانونو، حکمونو او لارښوونو ترڅنګ د امر بالمعروف او نهې عنالمنکر قانون د لا ښه پلي کېدو، معروفاتو اقامې او منکراتو د مخنیوي، عامه پوهاوي او همغږۍ په موخه له یو شمېر قومي مشرانو او سیمهییزو چارواکو سره ولیدل.
حنفي په دغه غونډه کې ویلي، د امر بالمعروف وزارت د خلکو ستونزو اورېدلو او حلولو ته ژمن دی، او خلک کولی شي خپلې ستونزې او شکایتونه د (۱۹۱) وړیا شمېرې له لاری ثبت کړي.
هغه دغهراز ویلي، د امر بالمعروف وزارت په ټولنه کې د ناوړه دودونو له منځه وړلو ته ژمن دی او هیچا ته به اجازه ورنکړل شي چې د ناوړه دودونو پر بنسټ د خلکو حقونه تر پښو لاندې کړي.
دی وایي چې امر بالمعروف وزارت د ښځو د ټولو شرعي حقونو ورکړې ته ژمن دی، هېڅوک حق نه لري چې ښځې په بدو کې ورکړي او یا یې پر نورو شرعي حقونو سترګې پټې کړي.
د امر بالمعروف وزیر ویلي: «ټول مسوولین او علماء مکلف دي چې په ملکي او نظامي ادارو او ټولنه کې د مشرتابه له لوري صادر شوي فرمانونه، حکمونه او لارښوونې پلې کړي، ټول علماء دنده لري ترڅو د محراب او ممبر له لارې د ټولنې په اصلاح کې برخه واخلي.»
د ده په خبره، امر بالمعروف او نهې عنالمنکر د اسلامي نظام د ملا د تير حیثیت لري او ټولنې ته روحي او معنوي پیاوړتیا وربخښي.
هغه ډاډ ورکړی چې د اسلامي امارت د مشرتابه له لوري د صادر شوو فرمانونو، حکمونو او لارښوونو او امر بالمعروف او نهې پلي کولو ته ژمن دي او یاده برخه کې به بشپړه هڅه کوي.
GET IN TOUCH
NEWSLETTER
SUGGEST A STORY
PAJHWOK MOBILE APP