احمدشاه عرفانیار

د راپورونو له مخې، د امریکا ولسمشر ډونالډ ټرمپ د ملګرو ملتونو د بشري حقونو له شورا سره د واشنګټن تعاملات او د فلسطینیانو لپاره د ملګرو ملتونو د مرستې له اژانس سره خپلې مرستې بندوي.

پاکستاني چارواکو ویلي، له پاکستانه بهر ته د تلونکو افغانانو د تګ قضیې که ژر حل نه شي، له پاکستانه به وایستل شي.

د راپورونو له مخې، د امریکا ولسمشر پر کاناډا او مکسیکو نوې لګولې تعرفې د ۳۰ ورځو لپاره ځنډولې، خو پر چین لګول شوې تعرفې بيا پر خپل ځای دي.

د اهل تشیع یو شمېر دیني عالمان د یووالي په رامنځته کېدو د ټینګار ترڅنګ وايي، تر اوسه د دوی له منځه د مخالفت غږ نه دی پورته شوی او نه به هم پورته شي او له ا.ا څخه غواړي چې ټولو ته یو شان حقونه ورکړي.

میدان‌وردګو کې سږ کال ۱۵۰ زره ټنه مڼې تولید شوې؛ د دغو مڼو لس سلنه بهر ته صادرې شوې خو یوازې د یو سلنه لپاره یې معیاري سړې خونې شته؛ بڼوال شکایت کوي چې ډېرې مڼې یې یا خرابېږي او یا يې هم په داسې ارزانه بیه پلوري چې لګښتونه یې نه شي پوره کولای.

د پژواک د خپرو شوو راپورونو له مخې، په افغانستان کې د روان لمریز کال په لومړیو لسو میاشتو کې د ۶۳۹ ترافیکي پېښو له امله ۷۶۷ کسانو ژوند له لاسه ورکړی او ۲۰۰۸ نور ټپیان شوي، خو د دې مودې د وروستیو پنځو میاشتو پر مهال ترافیکي پېښو کې د مرګ‌ژوبلې کچه نږدې ۳۲ سلنه کمه شوې ده.

د ایران د بهرنیو چارو وزیر افغانستان ته خپل سفر مثبت ارزولی او وايي، په دغه سفر کې، په ځانګړې توګه د پولو د امنیت او په ایران کې د افغان کډوالو اړوند مسایلو په اړه خبرې وشوې او افغاني چارواکي د ایران د حقابې په اړه ښکلی تعبیر لري.

د افغانستان بانک وايي، په پولي بازارونو کې نوسانونه د نورو هېوادونو په څېر یو طبیعي او معمول اقتصادي حالت دی، دغه بانک کافي مالي سرچینې په واک کې لري او د بیو د ثبات لپاره اړین اقدامات ترسره کوي.

د ټولګټو وزارت وايي، د افغانستان، ازبکستان، قرغيزستان او چين ترمنځ د څلور اړخيزه اقتصادي دهليز تړون د ۲۰۲۵ کال لپاره وغځول شو.

تیره اونۍ د جرمونو نړۍوالې محکمې یوه څارنوال له دې محکمې د ا.ا مشر او سترې محکمې د رییس د نیولو غوښتنه وکړه، خو ا.ا د یادې محکمې د څارنوال تورونه بې‌بنسټه وبلل او په کلکو ټکو یې وغندل، همداراز یوناما د نجونو پر زده‌کړو د بندیز دوام د اندېښنې وړ وباله، اروپايي ټولنې او ډنمارک له افغانستان سره ۵۸ میلیون ډالر مرسته اعلان کړه.

د الجزیرې د راپور له مخې، دا مهال د اسرائیلو په زندانونو کې لږ تر لږه ۱۰ زره او ۴۰۰ فلسطینیان بنديان دي چې له دې ډلې ۳ زره او ۳۷۶ تنه یې پرته له کوم تور یا محاکمې بندخونو کې ساتل کېږي.

د امریکايي رسنیو د خبر له مخې، له افغان بندي خان محمد سره په تبادله کې دوه امریکايي وګړي، راین کوربېټ او وېلیم مک‌کېنټي خوشې شوې دي.