احمد صهيب حسرت

د افغانستان لپاره د چین استازي وایي، هېواد یې د افغانستان په کورنیو چارو کې لاسوهنه نه‌ کوي او د دغه هېواد له سولې او بیارغونې خپل ملاتړ ته دوام ورکوي.

د بهرنیو چارو سرپرست وزیر د روغتیا نړیوال سازمان له مسوولینو غوښتي چې د افغانستان کورنی روغتیایي سیستم تجهیز او تقویه کړي او د ادویې په برخه کې دې کورني روغتیا سکتورونه غښتلی کړي تر څو د افغانستان روغتیایي مرکزونه تمویل او افغانان له صحي پلوه پرځان بسیا شي.

اسراییل وايي چې تېره شپه یې په ایران کې د توغندیو جوړولو مرکزونه او د هوا دفاعي سیسټمونه په نښه کړي او په ایران کې سرچینو هم څرګنده کړې چې د دغه هېواد د درېیو ولایتونو ړ نظامي مرکزونو ځینې برخې په نښه شوې چې په کې د پوځ دوه سرتېري وژل شوي دي.

اسراییل اعلان کړی چې د ایران ځیني نظامي مرکزونه یې په نښه کړي خو د ایران تسنیم اژانس وايي، یادو بریدونو کې دومره زیان نه دی خو په تهران کې هیڅ نظامي مرکز نه دی په نښه شوی.

د ریاست الوزراء سیاسي مرستیال د خصوصي ښوونځیو اتحادیې له استازو سره په لېدنه کې ویلي، ا.ا په هېواد کې له خصوصي سکتور ملاتړ کوي او ډاډ یې ورکړی چۍ د خصوصي ښوونځیو پر وړاندې شته ستونزې به د حل په موخه له اړوندو ادارو سره شریکې شي.

د کورنیو چارو وزارت وایي، پولیسو نیمروز کې «یو مسلکي او مشهور انسان‌تښتوونکی» نیولی چې په ایران کې یې څلور هېوادوال تښتولي او له کورنیو یې ۷۲ زره امریکایي ډالر اخیستي وو.

د افغانستان د سولې لپاره د امریکا پخواني استازي زلمي خلیلزاد په خیبر کې د پښتنو قومي جرګې پرېکړې مهمې بللې او وایي، په اړه یې د پاکستان غبرګون لا څرګند نه دی، خو ښایي منفي وي.

د پښتون ژغورنې غورځنګ مشر وایي، پاکستاني ځواکونو په خیبر کې د دغه غورځنګ له خوا د جوړېدونکې جرګې پر میدان برید کړی؛ دغه سیمه یې قبضه کړې او هلته د لویې ماشینرۍ پر مټ خندقونه کیندي.

د روسیې ځانګړي استازي ضمیر کابلوف ویلي، د دغه هېواد په کازان ښار کې د برېکس جوړېدونکې ناستې ته د اسلامي امارت بلنه د برېکس د غړو هېوادونو له نظر سره تړلې خبره ده.

د پاکستان د بهرنیو چارو وزارت پېښور کې یوه ناسته کې د پاکستان ملي سرود د غږېدو پر مهال د افغان سرقونسل د نه درېدو له امله احتجاج کړی، خو د افغان قونسلګرۍ وياند وایي، دغه کار د بې‌احترامۍ په نیت نه دی شوی.

د ټاپي یا له ترکمنستانه افغانستان، پاکستان او هند ته د ګاز نل‌لیکې پروژه – چې څنګ ته د نوري فایبر، اوسپنې پټلۍ او سړک پروژې هم لري – نن په هرات کې د ځانګړو مراسمو په ترڅ کې پرانیستل شوه او ورسره د «ټاپ» پروژې اړوند د نورالجهاد سب‌سټېشن هم ګټې اخیستنې ته وسپارل شو.

چارواکي وایي چې د کابل په تره‌خېلو کې د ۱۸ میلیون ډالرو په لګښت د ۲۵۲ میګاواټه برېښنا په ظرفیت د یوه سب‌سټېشن جوړولو او له چمتلې تر تره‌خېلو د ۲۲۰ کیلوواټه مزي غځولو چارې پیل شوې.