ترافیکي پېښې

د بغلان امنیه قومانداني وايي، تېره شپه د دغه ولایت په نهرین ولسوالۍ کې د یوه باروړونکي موټر چپه کېدو پېښه کې درېیو کسانو ته مرګ‌ژوبله اوښتې ده.

د غزني امنیه قومانداني وايي چې د دغه ولایت په مرکز کې د یوې ترافیکي پېښې له امله دوه کسان مړه شوي او اووه نور ټپیان دي.

د بلخ امنیه قومانداني وایي چې د دغه ولایت د مرکز مزارشریف ښار مربوطاتو کې په دوو جلا ترافیکي پېښو کې دوه کسان مړه او دوه نور ټپیان شوي دي.

ځايي مسوولین وايي چې د بامیان په نمبر۱ یکا‌ولنګ او د بغلان د خنجان ولسوالۍ شمالي سالنګ کې د ترافیکي پېښو له امله شپږ کسان وژل شوي او څلور نور ټپيان دي.

سرپل کې ځايي سرچینې وايي چې د دغه ولایت په مرکز کې د یوې ترافیکي پېښې له امله دوه کسان مړه او دوه نور ټپیان شوي دي.

د میدان‌وردګو ولایت په بهسودو ولسوالۍ کې د موټر چپه کېدو له امله دوه کسان مړه شوي او درې نور ټپیان دي.

په اروزګان او کندهار ولایتونو کې د درېیو جلا ترافیکي پېښو له امله د یوه زوم په ګډون څلور کسان مړه او اووه نور ټپیان شوي دي.

د جوزجان امنیه قومانداني وايي، د شبرغان – مزارشریف پر لویه لار د دوو ترافیکي پېښو له امله د ښځو او ماشومانو په ګډون ۱۲ کسان ټپیان شوي دي.

د میدان‌وردګو په جلریز ولسوالۍ کې د ترافیکي پېښې له امله یو کس مړ شوی او پنځه نور ټپیان شوي دي.

د غزني امنیه قومانداني وايي، د دغه ولایت په مقر ولسوالۍ کې د یوې ترافیکي پېښې له امله نهه کسان ټپیان شوي دي.

د ترافیک پولیسو عمومي ریاست وایي، د اختر ورځو کې د هېواد په کچه د ترافیکي پېښو له امله ۴۸ کسانو ژوند له لاسه ورکړی او ۱۶۱ نور ټپیان شوي دي.

د میدان‌وردګو امنیه قومانداني وايي، د دغه ولايت په سیداباد ولسوالۍ کې د یو ټکسي موټر چپه کېدو له امله يوې مېرمنې ژوند له لاسه ورکړی او څلور تنه نور ټپيان شوي دي.