کابل

د کابل په انتاني او افغان‌ – جاپان روغتونونو کې د سل میلیون افغانیو په لګښت د سیټي‌سکن تشخیصیه څانګو لپاره د دوو ودانیو جوړولو چارې پیل شوې.

د کرکټ د اتلانو جام (چمپینز ټرافي) نن سهار له متحده عربي اماراتو کابل ته راوړل شوه چې د افغانستان په بېلابېلو سیمو کې به نندارې ته وړاندې شي.

د روسیې د ملي امنیت شورا عمومي منشي ویلي هېواد یې هڅه کوي چې افغانستان په شانګهای سازمان کې د ناظر غړي په توګه خپله څوکۍ بېرته ترلاسه کړي او دغه‌راز ډېر ژر به د افغانستان او روسیې ګډ سوداګریز فورم هم پرانیستل شي.

د کابل یو شمېر ښاریان د برېښنا پرچاویو له ډېرېدو شکایت لري او د دې ستونزې د حل غوښتنه کوي خو د برېښنا شرکت وايي، پر یوه مهال‌وېش کار روان دی چې له مخې به یې په منظم ډول ښاریانو ته برېښنا ووېشل شي.

د تېر شنبې په پرتله نن کابل ښار کې د قزاقي اوړو او مالیزیايي غوړو بیې ټیټې شوې خو د هندي بورې او سرو زرو بیې لوړې شوې دي.

د افغانستان د فوټسال ملي کمېټې مسوولین وایي، کابل کې د راتلونکې ډسمبر میاشتې په لومړۍ نېټه د دیارلس لوبډلو ترمنځ د فوټسال غوره‌لیګ سیالۍ پیلېږي.

نن په کابل کې د ۹۷۰ میلیونه افغانیو په پانګونې سره د کمپلو یوې تولیدي فابریکې کار پیل کړ. دغه فابریکه به دا مهال په ورځني ډول د دوو زرو او په راتلونکي کې د پنځو زرو کمپلو د تولید وړتیا ولري.

د افغانستان د فوټبال فدراسیون وایي، کابل کې د اتو لوبډلو ترمنځ د ساحلي فوټبال غوره‌لیګ سیالۍ پیل شوې چې دوه اونۍ به دوام وکړي.

د افغانستان د عامې روغتیا وزارت وايي چې د قطر هېواد د طبي مرستو یو بسته کابل ته راورسېده.

نن کابل کې د اوبو اړوند د یوه علمي – څېړنیز سمینار ګډونوالو د اوبو پر مدیریت، سپما او دې برخه کې د سترو تاسیساتو پر جوړېدو ټینګار وکړ ویې ویل چې دغه برخه کې ښه مدیریت کولای شي سیمه‌ییزې اقتصادي همکارۍ لا پياوړې کړي.

د کابل ښاروالۍ په تېرو درېیو کلنو کې د بشپړو شوو پروژو عکسونو لپاره د کابل ښار په زرنګار پارک کې د «کابل نوی انځور» په نوم نندارتون جوړ کړی چې درې ورځې به پرانیستی وي.

د کورنیو چارو وزارت وايي، د نشه‌یي توکو سلګونه روږدي له درملنې او مسلکي زده‌کړو له ترلاسه کولو وروسته خپلو کورنیو ته وسپارل شول.