کابل

کابل ښار کې نن د سړکونو جوړولو درېیو پروژو چارې پیل شوې چې د نږدې دوو کلونو په موده کې به بشپړې شي.

د افغان – قزاق د نندارتون په پرانیست‌غونډه کې د سرپرست حکومت چارواکو وویل چې په هېواد کې تر بل هر وخت ډېر د سوداګرۍ لپاره فرصت برابر شوی او هېوادونه یې افغانستان کې سوداګرۍ ته راوبلل.

د کابل ښار لسمې امنیتي حوزې مربوطاتو کې یوې نجلۍ د یوې ودانۍ له نهم پوړه ځان راغورځولی خو ژوندۍ پاتې ده او دا مهال په روغتون کې بستر ده.

د افغانستان د صنعت او سوداګرۍ وزارت وايي چې د قزاقستان د دولت او خصوصي سکټور یو لوړپوړی ګډ پلاوی کابل ته راغلی دی.

د کورنیو چاور وزارت د نشه‌یي توکو پر وړاندې د مبارزې معینیت د تېر یو کال په موده کې د کابل په کچه راټول شوي څه باندې ۱۵ زره لېتره اوبلن او څه باندې درې زره کیلوګرامه جامد نشه‌یي توکي وسوځول.

د مالیزیا هېواد یو پلاوی چې بېلابېلو برخو کې د همکارۍ او اړیکو پراخېدو په موخه کابل ته راغلی، د ریاست‌الوزرا له سیاسي مرستیال سره په لیدنه کې یې ویلي، دوی به له نړۍ سره د اسلامي امارت تعامل لپاره‎ هڅه وکړي.

د ریاست‌الوزرا سیاسي مرستیال د افغانستان لپاره د روسیې ولسمشر له ځانګړي استازي سره په لیدنه کې ویلي، د کابل او مسکو ګډې هڅې کولای شي په سیمه کې د ګواښونو مخه ونیسي او هیله یې څرګند کړې څو په مسکو فارمټ کې افغانستان ته رسمي غړیتوب ورکړل شي.

علماوو کابل کې د امام ترمذي (رح) له دارالعلوم څخه د ۴۵ کسانو په فراغت‌غونډه کې د علم پر اهمیت خبرې وکړې، ویې ویل چې علم د اسلامي نظام لپاره «موقوف‌علیه» دی او د علم له لارې به افغانستان اباد شي.

د چاپېریال ساتنې ملي اداره وایي چې افغانستان کې د اقلیمي بدلون په اړه د حکومت د اطلاعاتو او رسنیو مرکز کې د ناروې کمېټې په همکارۍ درې ورځنۍ کنفرانس پیل شو.

د کابل امنيه قومانداني وايي، د کابل ښار د اووه‌لسمې امنيتي حوزې اوسېدونکی لس کلن ماشوم چې څلور کاله مخکې له خپلې کورنۍ څخه نادرکه شوی و، پیدا او کورنۍ ته وسپارل شو.

د المپیک ملي کمېټه وایي، د کابل منتخبې لوبډلې ته د لوبغاړو غوراوي لپاره د ۷۵ لوبغاړو ترمنځ د بډمنټون سیالۍ پیل شوې چې درې ورځې به دوام وکړي.

د افغاني سرې میاشتې ټولنه وايي، ۱۵ نور د سوري زړه په ناروغۍ اخته ماشومان یې د درملنې لپاره په کابل کې دوو روغتونونو ته معرفي کړي دي.