پژواک خبري اژانس دا ځل «نړۍ د پژواک له کړکۍ» خپرونه د کاناډا پلازمېنې اوټاوا ښار د ژمي موسم او واورې ته ځانګړې کړې ده. دغه ښار د کاناډا د اونټاریو ایالت اړوند او د شمالي امریکا لویې وچې د اوټاوا سین پر غاړه جوړ دی. له نن څخه ۱۶۵ کلونه پخوا د ۱۸۵۷ میلادي کال د ډسمبر په ۳۱مه د ملکې ویکټوریا له لوري د کاناډا پلازمېنې په توګه وټاکل شو. اوټاوا اوس نه یوازې د کاناډا پلازمېنه ده، بلکې د دغه ستر هېواد څلورم لوی او د نړۍ څلورم پاک ښار هم ګڼل کېږي. د یوې سروې له مخې، اوټاوا د عوایدو، هستوګنې، هوا او د ژوند د طریقې له نظره په کاناډا کې تر ټولو غوره ښار دی. اوټاوا څه باندې یو میلیون نفوس لري، ۶۰ سلنه وګړي یې په انګلیسي ژبه خبرې کوي، ۳۲،۶ سلنه ښاریان یې فرانسوي ژبې دي. دغه راز تر ټولو ډېر ۶۹.۱ اوسېدونکي یې اروپایان، نږدې پنځه سلنه اوسېدونکي یې ځایي سور پوستي او پاتې نور بېلابېل کډوال اقلیتونه دي خو د افغانانو شمېر لا هومره نه دی چې په فیصدۍ کې راشي. دغه راز اوټاوا د څلورو بېلو موسمونو په درلودو یو نیمګړی او براعظمي اقلیم لري؛ اوړی یې ګرم او مرطوب او ژمی یې سوړ وي. ژمی د پام وړ واورې په کې اوري چې په اوسط ډول یې کچه تر ۲۲۴ سانتي مترو پورې وي، دغه واوره له ډسمبر بیا تر مارچ او کله کله تر اپرېل میاشتې پورې پرته وي، خو لمرینې ورځې یې هم ډېرې وي. د ژمي په موسم کې یې د تودوخې درجه لکه د کابل په څېر اکثراً د سانتي ګراد په کچه له صفره کښته وي؛ کله کله تر ۱۵- او ځیني وخت تر ۲۷- پورې رسېږي.

Views: 3