کابل (پژواک،۱۲غبرګولی ۱۴۰۰): د ولسي جرګې ځينې غړي د کابل د تېرې ورځې برید غندلو ترڅنګ امنیتي مسوولین پر بې کفایتۍ تورن کړل او په امنیتي برخه کې یې پر اصلاحاتو ټینګار وکړ.
پرون ماښام د کابل ښار درېیمې امنیتي حوزې اړوند سیمه کې پر مسافر وړونکو موټر د دوو چاودنو له امله ۱۰ کسان ووژل شول او تر ۱۲ ډېر ټپیان شول. د یاد برید مسوولیت چا نه دی منلی. طالبانو په دغه برید کې لاس لرل رد کړي دي.
په دې جرګه کې د غزني د خلکو استازي عارف رحماني د یادو پېښو د غندلو ترڅنګ وویل، ولسي جرګه باید له دې ډېر د «هزاره ځانګړي قوم نسل کشي» پر وړاندې چوپ پاتې نه شي، ځکه د هغه په خبره، «د کابل په لوېدیځ کې د نسل وژنې سریال» پر یوه ناورین بدل شوی دی.
د نوموړي په خبره، په تېر شاوخوا یوه کال کې د کابل په لوېدیځ کې ۳۷ وسله وال بریدونه شوي، چې له امله یې ۱۰۰۰ کسان وژل شوي دي.
هغه امنیتي مسوولین د هېوادوالو په ځانګړې توګه کابل د لوېدیځ د امنیت د ټینګښت په برخه کې پر بې کفایتۍ تورن کړل او له حکومته یې وغوښتل چې امنیت ټینګ کړي، له دې پرته دې خلکو ته اجازه ورکړي چې د خپل امنیت د ټینګښت په برخه کې اقدام وکړي.
د ولسي جرګې غړې رقیې نایل هم د کابل پرونيو چاودنو ته په اشاره وویل: ((حکومت د هېوادوالو د امنیت پر ټینګښت مکلف دی، خو ناغېړي یې کړې ده او ولسي جرګه باید په دې اړه خپل دریځ روښانه کړي.))
هغې هم غوښتنه وکړه چې د کابل د لوېدیځ د امنیت د ټینګښت مسوولیت دې د سیمې خلکو ته وسپارل شي.
د جرګې څو نورو غړو هم ورته څرګندونې درلودې او ځینو یې په هرات، بغلان، فراه او بلخ ولایتونو کې د ناامنیو له ډېرېدو شکایت وکړ او له حکومته یې وغوښتل چې په امنیتي سکټور کې جدي اصلاحات رامنځته کړي، ځکه د دوی په خبره په یادو ولایتونو کې امنیتي مسوولین د مدیریت توان نه لري.
په دې جرګه کې د هرات د خلکو استازي محمد صادق قادري هم وویل: ((هرات جدي وګڼئ او د هرات امنیتي مسایل باید د حکومتي پروګرامونو په سر کې ځای ولري، جګړه د ښار دروازو ته رسېدلې ده، اختطاف او زورمندي اوج ته رسېدلې ده.))
په دې جرګه کې د نیمروز د خلکو استازي ګل احمد نورزاد وویل: ((په مرکز او ولایتونو کې امنیت خراب شوی، تر څو چې ولسمشر په امنیتي سکټور کې جدي اصلاحات رامنځته نه کړي، امنیت به ټینګ نه شو.))
د ولسي جرګې لومړي نایب احمد جاوېد جیحون چې د جرګې د نننۍ ناستې مسوولیت یې پر غاړه و، د جرګې د داخلي امنیت او دفاعي چارو کمېسیونونو ته دنده ورکړه چې د یادو کمېسیونونو ګډې ناستې ته د امنیتي وضعیت او امنیتي سکتور اقدماتو په تړاو امنیتي مسوولین استجواب کړي او راپور یې له جرګې سره شریک کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن