میدانښار (پژواک، ۲ زمری ۱۴۰۲): د میدان وردګو مسوولین د دې ترڅنګ چې وايي، د وړمې شپې سېلابونو له امله په دغه ولایت کې ۳۲ تنه مړه شوي او ۲۶ نور ټپیان دي، زياتوي چې سیلاب ځپلو کورنیو ته د مرستو رسولو کمپونه جوړ شوي دي.
د میدان وردګو د طبیعي پېښو پر وړاندې د چمتووالي ادارې رییس مولوي فیض الله جلالي پژواک خبري اژانس ته وویل، د میدان وردګو د جلریز ولسوالۍ په تکانې سیمه کې د حکومتي ادارو له لوري زیانمنو کورنیو ته د مرستو رسولو او مرستندویه بنسټونو سره د همغږۍ په موخه درې کمپونه جوړ شوي دي.
د ده په خبره، دوی نن له یو شمېر حکومتي ادارو او مرستندویه بنسټونو سره په همغږۍ د مرستو رسولو درې کمپونه او زیانمنو کورنیو ته لنډ مهاله استوګنځي ورغول شول.
هغه زياته کړه، په دغو کمپونو کې هغو کورنیو ته چې کورونه یې په سېلابونو کې بشپړ ویجاړ شوي، تیار خواړه وېشل کېږي.
د نوموړي په وینا، له تېرې ورځې راهيسې یې د جلریز ولسوالۍ د تکانې سیمې سېلابځپلو کورنیو ته د ژوند د لومړنیو توکو هر ډول وسایل لکه خېمې، د کور اړین وسایل، خوراکي توکي، صحي اوبه او روغتیایي کېټونه رسولي دي.
نوموړي د وړمې شپې سېلابونو د مرګژوبلې د تازه شمېر په اړه وویل چې تر دې مهاله د ولایت په کچه ۳۲ کسان مړه شوي او ۲۶ نور ټپیان دي.
ده زیاته کړه، د وړمې شپې سېلابونو د دغه ولایت په بېلا بېلو ولسوالیو کې ۶۰۰ کورونه په بشپړه او ۴۰۰ یو څه ویجاړ کړي دي.
تېره ورځ د میدانوردګو ولایت پېښو ته د رسېدو چارو رییس ويلي و، د جلرېز ولسوالۍ په تکانې سیمه کې په یوه کور کې د واده مراسم وو چې سېلاب لاندې کړی او ګڼ شمېر کسانو ته مرګژوبله اوښتې ده.
ده زياته کړې وه: «تر اوسه له دغه کوره ۲۲ شهیدان له خاورو را ایستل شوي او لسګونه نور نادرکه دي چې د پيدا کولو لپاره يې هڅې روانې دي.»
له بلې خوا د دغه ولایت په څو نورو ولسوالیو کې خلک وایی، د نورو زیانونو ترڅنګ دوی اوسمهال د څښاک پاکې اوبه نه لري، ځکه د اوبو څاګانې یې سېلابونو ډکې کړي دي.
د نرخ ولسوالۍ اوسېدونکي شرافت پژواک ته وویل، د دوی په سیمه کې سېلابونو خلکو ته درانه مالي زیانونه اړولي او ډېری کښتونه یې له منځه تللي دي.
هغه وویل: “کورونه مو سېلابونو ویجاړ کړي، څاګانې مو خړو او خاورو لاندې کړي، د څښاک اوبه نه لرو.”
نوموړي غوښتنه وکړه چې دوی ته دې د نورو اړتیاوو ترڅنګ د څښاک پاکې اوبه برابرې شي.
د مرکز اړوند د چارکي سیمې بل اوسېدونکي رحمت الله وویل، کور یې سېلابونو لاندې کړی او د ژوند هر ډول وسایل یې له لاسه ورکړي دي.
د هغه په وینا، تر اوسه ورسره چا مرسته نه ده کړې او ژوند یې سخت شوی دی.
دی زياتوي: «کور مو له اوسېدو وتی، اوس د خپلو دوستانو کره شپې کوو، حکومت دې موږ سره مرستې وکړي چې بېرته مو کورونه ورغوو.»
د میدان وردګو د پېښو پر وړاندې د چمتووالي ادارې رییس بیا وویل، دوی هڅه کوي د ټولو زیانمونو کورنیو ستونزو ته رسېدنه وکړي.
وروستیو سېلابونو پر میدان وردګ ولایت سربېره د هېواد په نورو ولایتونو کې هم خلکو ته درانې مالي او ځاني زیانونه اړولي دي.
د کابل امنیه قوماندانۍ نن وويل چې د سېلابونو له امله د کابل په پغمان کې اته کسان مړه او اته نور ټپیان شوي او ۲۵۰ کورونه په نیمه یا بشپړ ډول ویجاړ شوي دي.
Views: 22
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن