افغان او ایراني چارواکو په بېلابېلو برخو کې پر ګډو همکاریو خبرې وکړې

کابل (پژواک، ۱۴ لړم ۱۴۰۲): د افغانستان د ریاست‌الوزار اقتصادي مرستیال ملا عبدالغني برادر او  د ایران بهرنیو چارو وزیر په سیاسي، اقتصادي، تعلیمي، کلتوري او نورو برخو کې پر ګډو همکاریو خبرې کړې دي.

د اقتصادي معاونیت په خبرپاڼه کې راغلي چې د ریاست‌الوزرا اقتصادي مرستیال ملا عبدالغني برادر او مل پلاوي نن د ایران د بهرنیو چارو له وزیر امیر عبداللهیان او مل پلاوي سره په هغه هېواد کې کتلي دي.

سرچينې لیکلي، ملا عبدالغني برادر په دې لیدنه کې له ایران سره د سوداګریزو اړیکو او ترانزیټ پر پراختیا، د دواړو هېوادونو ترمنځ په بېلابېلو سکټورونو کې د ګډ کار په موخه د تخنیکي کمېټو پر جوړېدو، د ایران له لارې د سیمې او نړۍ له هېوادونو سره د افغانستان د سوداګرۍ پر زیاتېدو، په افغانستان کې د ایراني پانګوالو پر پانګونې، افغانانو ته د وېزو د ورکړې په برخه کې د لازمو اسانتیاوو پر برابرولو او همدارنګه په ایران کې د مېشت افغان کډوالو ستونزو پر هواري او له هغوی سره پر ښه چلند هر اړخیزې خبرې وکړې.

په دې کتنه کې دواړو لورو په سیاسي، اقتصادي، تعلیمي، کلتوري او نورو برخو کې د ګډو همکاریو په اړه هم بحث او خبرې وشوې.

ملا برادر ویلي، افغانستان او ایران د تاریخ په اوږدو کې دوه دوست او ګاونډي هېوادونه پاتې شوي چې یو له بل سره ښې سیاسي، اقتصادي او کلتوري اړیکې لري او په کار ده چې د یادو اړیکو د پراختیا او پياوړتیا لپاره په ګډه کار وشي.

هغه زیاته کړې، افغانستان غواړي د ایران له لارې افغاني صادرات او واردات زیات کړي او له ایران څخه یې غوښتي چې په دې اړه لازمې اسانتیاوې رامنځته کړي.

د ایران بهرنیو چارو وزیر امیر عبداللهیان د ریاست‌الوزراء اقتصادي مرستیال ته د دواړو هېوادونو ترمنځ د سوداګرۍ د پراختیا، د وارداتو او صادراتو په برخو کې د اسانتیاوو راوستلو، د دواړو هېوادونو ترمنځ په بېلابېلو سکټورونو کې د ګډ کار په موخه د کمېټو پر جوړېدو، په ایران کې د افغان کډوالو ستونزو ته د رسېدو او په افغانستان کې د ایراني پانګوالو له لوري د پانګونې د هڅونې ډاډ ورکړی او ویلي یې دي چې په دې اړه به اړوندې ادارې په ګډه کار وکړي.

اقتصادي معاونیت لیکلي، د واخان کوریډور پر جوړولو او له دې لارې پر ګټې اخيستنې دواړو لورو ټینګار وکړ او زیاته یې کړه چې دا لاره د دواړو هېوادونو په ګټه ده او توافق وشو چې له دواړو لورو دې د کار د تېزوالې او ښې همغږۍ لپاره مشترکې کمېټې جوړې شي.