کابل (پژواک، ۱۵ لړم ۱۴۰۲): د افغانستان امر بالمعروف، نهی عن المنکر او د شکایتونو اورېدو وزارت وايي، هېواد ته له پاکستانه راستانه شوي د محتسبینو په شرایطو برابر افغان کډوال په دغه وزارت کې په دندو ګوماري.
د روانې نوامبر میاشتې په لومړۍ نېټه پاکستان کې هغو افغان کډوالو ته له دغه هېواده د وتلو ورکړل شوي ضربالاجل وروستۍ ورځ وه چې د کډوالۍ اسناد نه لري. د معلوماتو له مخې، یو عشاریه څلور میلیونه دا ډول افغانان پاکستان کې اوسېږي. د راپورونو له مخې، اوس پاکستاني پولیس افغان کډوال نیسي، کورونه یې ړنګوي او تر اوسه یې ګڼ شمېر په زور ایستلي دي.
د افغانستان د کډوالو چارو سرپرست وزير خليلالرحمن حقاني وايي، له هغه وروسته چې له پاکستانه د افغان کډوالو د جبري ایستنې لړۍ پيل شوې، تر اوسه څه باندې ۳۰۰ زره کډوال خپل هېواد ته راستانه شوي دي.
د امر بالمعروف، نهی عن المنکر او شکایتونو اورېدو وزارت په خبرپاڼه کې راغلي چې د هېواد په مرکز او ولایتونو کې د راستنو شوو افغانانو لپاره کاري فرصتونه برابروي.
سرچینې زیاته کړې چې راستنو شوو افغانانو کې هغه علماء چې د امربالمعروف، نهی عن المنکر او شکایتونو اورېدلو وزارت د محتسبینو په شرایطو برابروي د دغه وزارت له لوري د هغوی د اسنادو تر ارزونې وروسته استخدامېږي.
سرچینه زیاتوي، راستانه شوي افغانان کولای شي چې خپل تحصیلي اسناد، د تذکرې کاپي او څلور عکسونه د روان لمریز کال د لېندۍ میاشتې تر ۵مې له یاد وزارت سره شریک کړي.
د سرچینې په حواله، د امربالمعروف، نهی عن المنکر او شکایتونو اورېدلو وزارت سرپرست شېخ محمد خالد الحنفي په ټولو خپلو ولایتي او مرکزي ریاستونو غږ کوي چې له راستنو شوو افغانانو سره هر ډول خواخوږي وکړي او هڅه وکړي چې د کورونو ترتیب کې ورسره مرسته وکړي او خلک وهڅوي چې په وړیا ډول او یا ارزانه توګه ورته کورونه ورکړي او نورې مرستې ورسره وشي.
پاکستان په داسې حال کې د هغوی په وینا اسناد نه لرونکي افغان کډوال په زور وباسي چې ملګرو ملتونو، یو شمېر پاکستاني سیاستوالو او د بشري حقونو سازمانونو ورڅخه غوښتي چې دغه کډوال دې په زور نه وباسي.
د افغانستان اسلامي امارت هم له پاکستانه غوښتي چې له تحمله کار واخلي او د ښه ګاونډیوب، اسلامي اخوت او بشري عاطفې له مخې دې افغان کډوال جبراً نه وباسي.
اسلامي امارت ويلي، په کومو هېوادونو کې چې افغانان مېشت دي، د هغو هېوادونو امنیت ته يې ستونزه نه ده جوړه کړې او نه هم په بې ثباتیو کې لاس لري.
دا مهال له پاکستانه راتلونکو افغان کډوالو ته په تورخم کې دوه کمپونه جوړ شوي او ټول لومړني خدمات ورته وړاندې کېږي. حکومت ویلي، راستنېدونکو کډوالو ته ترانسپورتي او نورې اسانتیاوې هم برابروي.
Views: 26
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن