کال (پژواک، ۵ غويی ۱۴۰۳): له افغان شخصیتونو سره د اړيکو کمېسیون په بهر کې پر مېشتو هغو افغانانو چې د تېر حکومت پوځي او اداري کارکوونکي وو، غږ کوي چې بېرته هېواد ته راستانه شي او پر «بېبنسټه تبلیغاتو» تېر نهوځي.
دا په داسې حال کې ده چې ځينو رسنيو د افغانستان «د تېر حکومت د پوځیانو ملاتړ کمېټې» له قوله ويلي چې که افغان پوځیان له پاکستان او ایرانه وایستل شي، ژوند به یې له ګواښ سره مخ شي.
له افغان شخصيتونو سره د اړيکو او هېواد ته د هغوی راستنولو کمېسيون له بهرنيو هېوادونو د تېر حکومت د کارکوونکو راستنېدو په تړاو خپره شوې اعلامیه کې راغلي چې د اسلامي امارت له بیا حاکمېدو سره سم په ټول افغانستان کې عمومي عفوه پلې شوې او ټولو افغانانو ته د سولې او ګډ ژوند فرصتونه برابر شوي دي.
سرچينه زياتوي چې د عفوې فرمان د لا ښه پلې کېدو په موخه د اسلامي امارت مشرتابه د حکم پر بنسټ له افغان شخصيتونو سره د تماس کمېسيون جوړ شوی او تر دې مهاله ۸۳۹ افغان شخصيتونه بېرته هېواد ته راستانه شوي او اوس دلته ارام او خوشحاله ژوند کوي.
په اعلاميه کې راغلي: «هیڅ کوم جهت د دې اجازه نه لري چې د تېرې ادارې کسان په دې وجه چې په تېره اداره کې يې کار کړی، وځوروي او ګواښ ورته متوجه کړي؛ موږ یو ځل بیا په بهر کې (په ځانکړي ډول په ګاونډيو هېوادونو کې) پر مېشتو هغو افغانانو چې د تېرې ادارې نظامي او اداري کارمندان پاتې شوي، غږ کوو او ډاډ ورکوو چې خپل هېواد ته راستانه شي، د ځینو اړخونو او مغرضو رسنیو پر بېاساسه تبلیغاتو غلط نه شي، په افغانستان کې د دوی ژوند ته هیڅ خطر موجود نه دی؛ دوی کولی شي لکه د نورو افغانانو په څېر په امن کې ژوند وکړي او د هېواد په ابادۍ کې برخه واخلي.»
Views: 188
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن