کابل (پژواک، ۵ جنګاښ ۱۴۰۳): د ټولګټو وزارت وايي، دوو میاشتو کې د هېواد اوسپنې پټلۍ له لارې ۶۰۹ زره او ۱۵۸ مټریک ټنه انتقالات شوي دي.
د یاد وزارت ویاند محمداشرف حقشناس نن پرخپله اېکس پاڼه لیکلي چې د روان ۱۴۰۳ لمریز کال په تېرو دوو «غويي او غبرګولې» میاشتو کې یاده اندازه انتقالات شوي دي.
سرچینه وایي ، د حیرتان بندر له لارې ۴۷۱ زره او ۵۳۶ ټنه، د آقینې بندر له لارې ۶۸ زره او ۶۷۶ ټنه، د تورغونډۍ بندر له لارې ۶۸ زره او ۴۶۲ ټنه او د هرات – خواف له لارې ۴۸۴ ټنه توکي وارد او صادر شوي دي.
سرچینې زیاته کړې، انتقالاتي توکو کې نفتي، غیرنفتي او نور توکي شامل دي.
د ټولګتو وزارت د ویاند په خبره، د انتقالاتو له ډلې ۳۳ زره او ۱۶۱ ټنه صادرات شوي چې لویه برخه یې وچه مېوه، معدني ډبرې او د انارو جوس دي.
د سرچینې په حواله، هرڅومره چې د اوسپنې پټلۍ له لارې د صادراتو او انتقالاتو کچه لوړېږي په هماغه اندازه کاري فرصتونه برابرېږي، ملي عواید زياتېږي او په ټوله کې اقتصادي ثبات، ترقۍ او ځان بسياينې ته لاره هوارېږي.
د سرچینې د معلوماتو له مخې، د ټولګټو وزارت د اوسپنيزې کرښې معینیت هڅه کوي څو د لا زیاتو انتقالاتو لپاره مناسب شرایط برابر او سوداګرو ته لا زياتې اسانتياوې برابرې کړي.
Views: 8
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن