د هېواد په ۱۶ ولایتونو کې د سختو ورښتونو اټکل شوی

کابل (پژواک، ۱۱ زمری ۱۴۰۳): د ترانسپورټ او هوایي چلند وزارت، د هېواد په ۱۶ ولایتونو کې د سختو ورښتونو، تالندې، تندر او ناڅاپي سېلابونو د احتمال خبر ورکړی دی.

یاد وزارت نن (پنجشنبه، د زمري ۱۱مه) پر خپله اېکس‌پاڼه د یوې خبرپاڼې په خپرولو سره لیکلي چې سبا او بل سبا (د زمري ۱۲مه او ۱۳مه) په بدخشان، نورستان، کونړ، ننګرهار، لغمان، پنجشېر، کاپیسا، کابل، میدان‌وردګ، لوګر، پکتیا، خوست، پکتیکا، غزني، زابل او کندهار ولایتونو کې د باران، تالندې او برېښنا او ناڅاپي سېلابونو د احتمال وړاندوینه شوې ده.

د سرچینې به وینا، په بېلابېلو برخو کې د باران کچه له ۱۵ تر ۴۰ ملي مترو اټکل شوې ده.

سرچینه زیاتوي، د سالنګونو په ګډون د هېواد په شمالي، لوېدیځ، سوېلي، ختیځ او مرکزي ولایتونو کې د چټکو بادونو احتمال شته چې سرعت یې په ساعت کې له ۵۰ تر ۸۰ کیلومترو پورې اټکل شوی دی.