فراه کې د سېلابونو له امله ۲۱ کسانو ژوند له لاسه ورکړی او شپږ نور ټپيان دي

فراه (پژواک، ۷ کب ۱۴۰۳): د فراه سیمه‌ییز مسوولین وایی، د دغه ولایت په پشت‌کوه ولسوالۍ کې د سیلابونو راوتو له امله ۲۱ کسانو خپل ژوند له لاسه ورکړی او شپږ نور ټپيان شوي دي.

د فراه ولایت د پیښو پر وړاندي د مبارزي د چمتووالی رییس مولوی محمداسراییل سیار پژواک خبري اژانس ته وویل: «نن شاخوا درې نیمي بجې په پشت‌کوه ولسوالۍ کې یو شمېر خلک چې ماشومان او ښځې هم ورسره وې، غره ته د تفرېح لپاره تللي وو چې د سېلاب راوتلو پر مهال په غره کي بند پاتې وو، ۲۱ کسان مړه شوي او ۶ نور ټپیان دي.»

د فراه ولایت د امنیه قوماندانۍ ویاند مولوي محمدنسیم بدري هم دغه پېښه تاییدوي او وایي چې امنیتي ځواکونه سیمې ته رسېدلي څو د پېښې قربانیان را انتقال کړي.