کندهار (پژواک ٢٥ غبرګولى ٩١): د کندهار امنيتي چارواکي وايي، چې په تېرو دوو اونيو کې په کندهار ښار او ولسواليو کې د عملياتو پر مهال ٣٨ وسلوال مخالفين وژل شوي او ٢٩ نور ژوندي نيول شوي دي.
هغه دغه راز د جنايي جرمونو په تړاو د ١٤ تنو او د نشه يي توکو په تړاو د ١٧ نور د نيول کېدو خبر هم ورکړ.
سمونوال رحمت الله اطرافي د کندهار د امنيې قومندانۍ د امنيت امر، چې نن (د غبرګولي ٢٥مه) يې د ولايت مقام له رسنيو سره د اړيکو او معلوماتو په مرکز کې اوونيز امنيتي کنفرانس ته خبرې کولې وويل، چې په تېرو دوو اوونيو کې يې ١٠ عمليات، ٢٤٠ کمينونه او ١٦٠ ګزمې ترسره کړې دي.
د هغه په خبره، د پوليسو د دغو فعاليتونو پر مهال په کندهار ښار او ولسواليو کې ٣٨ وسلوال مخالفين وژل شوي، چې ١٩ يې د سرحدي پوليسو له خوا په ښورابک او سپين بولدک ولسواليو کې له منځه وړل شوي دي.
د نوموړي په وينا، په دغو عملياتو کې ٢٩ وسلوال مخالفين ژوندي هم نيول شوي، چې له هغوى څخه ګڼ شمېر وسلې او چاودېدونکي توکي د پوليسو لاس ته ورغلي دي.
اطرافي د جنايي جرمونو په تړاو د ١٤ تنو د نيولو خبر هم ورکړ او ويې ويل، چې له دې ډلې ٨ تنه پر غلا، ٣ په سړي تښتوونه او ٣ نور په جعل کارۍ تورن دي، چې دوسيې يې اړوندو څارنواليو ته لېږل شوي دي.
په دې وروستيو کې په کندهار ښار کې د غلا په ځانګړې توګه د موټرونو د غلا پېښې زياتې شوې، خو د امنيت امر وايي، چې په کندهار کې د موټرونو د درولو لپاره کافي تم ځايونه نشته او خلک په لارو او کوڅو کې موټرونه دروي، چې دغه راز پېښې رامنځته کېږي.
نوموړي وويل، چې په کندهار ښار او ولسواليو کې د نشه يي توکو په تړاو ١٧ تنه نيولي او له هغوى څخه يې ٨١٥ کيلوګرامه چرس، ٢ کيلوګرامه هيرويين، ٧ کيلوګرامه ترياک او ٥٠ کيلوګرامه کيمياوي توکي هم ترلاسه کړي، چې دوسيې يې تر څېړنې لاندې دي.
اطرافي له ولسي خلکو مننه وکړه، چې د کندهار ولايت په امنيت کې ورسره همکاري کوي او له امله يې د پوليسو لاسته راوړنې زياتې شوې دي.
د کندهار والي ډاکټر توريالي ويسا هم څو ورځې وړاندې ژېړۍ ولسوالۍ ته د خپل سفر پر مهال د کندهار امنيت ښه ارزولى و، خو ويلي يې وو، چې د لا ښه ډاډمن امنيت په موخه به په ژېړۍ، پنجوايي او ميوند کې چاڼيز عمليات کوي او ښې حکومتدارۍ ته به وده ورکوي.
وسلوالو طالبانو تر دې مهاله د حکومت د دغو څرګندونو په اړه څه نه دي ويلي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن