<p style="text-align: justify;">میدانښار (پژواک، ۱۱ وږی ۱۴۰۳): د میدانوردګو ولایت په نرخ ولسوالۍ کې د سل زره امریکايي ډالرو په لګښت د یوه استنادي دېوال جوړولو چارې پيل شوې.</p>
<p style="text-align: justify;">د یادې پروژې د پیل پر مهال د میدانوردګو سیندیزې حوزې رییس مولوي عبدالصمد حلیم وویل، دغه پروژه د سیندیزې حوزې په چوکاټ کې د ملګرو ملتونو د خوړو او کرنې سازمان په مالي ملاتړ د سل زره امریکايي ډالرو په لګښت جوړیږي.</p>
<p style="text-align: justify;">هغه زیاته کړه، دغه استنادي دېوال د نرخ ولسوالۍ په ده حیات سیمه کې د ۱۷۰ مترو په اوږدوالي او څلور مترو په لوړوالي د درېیو میاشتو په موده کې جوړیږي.</p>
<p style="text-align: justify;">هغه زیاته کړه چې د ولس خدمت د حکومت مسوولیت دی او د دوی اداره هڅه کوي د خلکو اړتیاوو ته په کتو او انډولیز پرمختګ ته په پام پروژې پلې کړي.</p>
<p style="text-align: justify;">ورته مهال، د ده حیات سیمي اوسېدونکي د دغه دېوال جوړېدو ته خوښ دي.</p>
<p style="text-align: justify;">د سیمې یوه مخور ګلجان وویل چې د دغه استنادي دېوال په جوړېدو به د سېلابونو مخه ونیول شي او هم به د یو څه وخت لپاره خلکو ته کاري فرصت برابر شي.</p>
<p style="text-align: justify;">هغه زیاته کړه، دلته تر اوسه دېوال نشته، هر وخت سېلابونه د خلکو ځمکې او فصلونه خرابوي.</p>
<p style="text-align: justify;">د یادې سیمې یو شمېر نورو اوسېدونکو هم له حکومتي مسوولینو په دې سیمه کې د ورته نورو پروژو پلې کېدو غوښتنه وکړه.</p>
