<p style="text-align: justify;">کابل (پژواک، ۱۱ زمری ۱۴۰۳): د ریاستالوزراء سیاسي مرستیال له یو شمېر قومي مشرانو سره په ليدنه کې ویلي، ا.ا د خلکو اصلاحي مشورو او نظرونو ته ارزښت ورکوي او هر افغان کولای شي خپل نظر له چارواکو سره شریک کړي.</p>
<p style="text-align: justify;">ارګ پر خپله اېکسپاڼه لیکلي چې د ریاستالوزراء سیاسي مرستیال مولوي عبدالکبیر نن په کابل کې د پخواني حکومت له یو شمیر چارواکو، قومي مشرانو، پوهانو او د بېلابېلو ولایتونو له عالمانو او ځوانانو سره وکتل.</p>
<p style="text-align: justify;">سرچينې لیکلي چې په دې لیدنه کې د پخواني حکومت پر مهال د حج او اوقافو وزیر محمد صدیق چکري، د اوبو او برېښنا وزیر سید محمدایوب او د کورنیو چارو وزیر منشي عبدالمجید د نورو په استازولۍ خبرې وکړې او ویې ویل، په افغانستان کې د اسلامي نظام حاکمیت د افغانانو هیله وه او دوی د دې نظام د پایښت او پياوړتیا لپاره هر راز همکارۍ ته چمتو دي.</p>
<p style="text-align: justify;">هغوی زیاته کړې، نړۍوال په افغانستان کې اسلامي نظام نشي زغملی او له مختلفو لارو هڅه کوي چې دا نظام متضرر کړي.</p>
<p style="text-align: justify;">ارګ د یادو کسانو له قوله لیکلي چې د اسلامي امارت د مشرتابه فرمانونه د اسلامي نظام برخه ده او له اسلامي نظام څخه ملاتړ د مسلمانانو دیني مسؤولیت دی.</p>
<p style="text-align: justify;">د ریاستالوزرا سیاسي مرستیال مولوي عبدالکبیر هم ویلي، اسلامي امارت د پخوانۍ او تېرې جهادي دورې هیلې پوره کړې او ثابته یې کړه چې د جهاد له پای ته رسېدو وروسته افغانان د ناخوالو پر ځای د خپلواک نظام څښتنان او په امن کې ژوند کوي.</p>
<p style="text-align: justify;">ده ویلي، اسلامي امارت اصلاحي مشورو او نظرونو ته ارزښت ورکوي، او هر افغان کولای شي په مستقیم ډول خپل نظر له مسؤولینو سره شریک کړي او د امارتي ادارو دروازې د خلکو پر مخ پرانیستې دي.</p>
