په خوست کې ډاياګ ته سپکې او درنې وسلې وسپارل شوې

خوست ښار (پژواک ١٩ سلواغه ٩١): په خوست کې د ډاياګ پروګرام مسوولين وايي، چې د افغان  ځواکونو له لوري نيول شوې ٣٩ ميله وسلې دوى ته وسپارل شوې.

په خوست کې د ډاياګ (د غيرقانوني وسلوالو ډلو د بې وسلې کولو پروګرام) مسوول ډګروال شېرزاد د سلواغې په ۱۹مه پژواک اژانس وويل، چې دغه وسلې نن د خوست ولايت مقام په انګړ کې ورته وسپارل شوې.

د هغه په وينا، په دغو وسلو کې دوه ۸۲ ملي متري توپونه، ۹ راکټ انداز، ۵ پيکاوې، ۴  دهشکې، ۱۵ کلاشيکوفونه، ۳ يوولس ډزي ټوپک  او درې تومانچې شاملې دي.

نوموړي زياته کړه، چې دغه وسلې ملي اردو او ملي پوليسو د خوست په بېلابېلو سيمو کې د  مختلفو عملياتونو په ترڅ  کې ترلاسه کړې وې.

د خوست والي عبدالجبار نعيمي، چې په يادو مراسمو کې يې ګډون کړى و، وويل، چې په خوست کې افغان ځواکونه د پخوا په پرتله زيات پياوړي شوي دي.

ده زياته کړه، چې دا مهال په دغه ولايت کې افغان ځواکونه د دې جوګه دي، چې په يواځې ځان عمليات ترسره کړي او د بدو پېښو مخه ونيسي.

د ده په خبره، په خوست کې ډاياګ ته د وسلو سپارل د دې څرګندونه کوي چې دلته امنيت ښه شوى او امنيتي ځواکونه له غيرقانوني وسلوالو څخه وسلې راټولې او د خلکو امنيت خوندي کړي.

د يادونې ده، چې په روان لمريز کال کې د خوست په بېلابېلو سيمو کې ۱۶۸ ميله سپکې او درنې وسلې افغان ځواکونو لاس ته راوړي او ډاياګ پروګرام ته سپارل شوې دي.

Views: 1