د میدان‌وردګو ولایت دوو ولسوالیو ته نوې ودانۍ جوړې شوې

میدان‌ښار (پژواک، ۲۴ لړم ۱۴۰۳): میدان‌وردګو کې مسوولین وایي چې د دغه ولایت د جغتو او نرخ ولسوالیو لپاره د نږدې ۴۰ میلیون افغانیو په لګښت نوې ودانۍ جوړې او ګټې اخیستنې ته وسپارل شوې.

د یادو ودانیو د ګټې اخیستنې پر مهال د کورنیو چارو وزارت د تامیناتي چارو معین مولوي عبدالله مختار وویل چې دوی په تېر کال کې د هېواد په کچه د ۲۳ ولسوالیو لپاره د ودانیو جوړولو چارې پیل کړې چې له ډلې یې د دغه ولایت د جغتو او نرخ ولسوالیو ودانۍ هم دي.

هغه زیاته کړه، هڅه کوي راروان کال کې هم په دغه ولایت د یو شمېر نورو ولسوالیو ودانیو جوړول هم په پلان کې ونیسي.

هغه له خلکو هیله وکړه چې د نظام د پایښت او د هېواد بیارغونه برخو کې خپل مسوولیت ادا کړي.

ورته مهال، د میدان‌وردګو والي قاري بختیار معاذ د یادو ودانیو پر جوړېدو خوښي وښوده او زیاته یې کړه چې د اسلامي امارت مسوولین د هېواد بیارغونې ته ژمن او په ټول هېواد کې یې بنسټیزې پروژې پیل کړې دي.

دغه راز، د خلکو په استازولۍ د نرخ ولسوالۍ یوه قومي مشر دادالله له حکومته مننه وکړه چې د یادو ولسوالیو د خلکو لپاره د خدمتونو وړاندې کېدو په موخه یې معیاري ودانۍ جوړې کړې.

هغه زیاته کړه، له دې مخکې د ولسوالیو د معیاري وداینو نشتوالي له امله خلک له ډېرو ستونزو سره مخ وو.

د یادونې ده، په دغه ولایت کې یو شمېر نورې ولسوالۍ هم تر دې مهاله معیاري ودانۍ نه لري چې حکومتي مسوولین او خلک یې له ستونزو سره مخ دي.