کابل (پژواک ۲۵ سلواغه ۹۱): ولسمشر حامد کرزي له خپل امريکايي سيال بارک اوباما سره په ټېلېفوني اړيکه کې ويلي، چې له نورو هېوادونو سره يې هر ډول اړيکې د ملي يووالي، غښتلي مرکزي حاکميت او ملي حاکميت پر بنسټ ولاړې دي.
د ولسمشر له دفتره په خپره شوې خبرپاڼه کې راغلي، چې حامدکرزي تېر ماښام د ويډيو کنفرانس له لارې د امريکا د متحدو ايالتونو له ولسمشر بارک اوباما سره خبرې وکړې.
سرچينې ليکلي، چې په دغه ويډيو کنفرانس کې دواړو ولسمشرانو د افغان سولې اړوند مسايلو، د ملي اردو سمبالښت او غښتلتيا، امنيتي تړون، چې ټاکل شوې د دواړو هېوادونو ترمنځ لاسليک شي او ځينې نور د علاقې وړ مسايل، په دغو خبرو کې تر دوستانه او مفصل بحث لاندې ونيول.
د ولسمشر د ويندوى دفتر دغه راز زياته کړې، چې د افغانستان ولسمشر تېره ورځ په افغانستان کې د ناټو ځواکونو د نوي ټاکل شوي قوماندان جنرال جوزف ډنفورډ سره د پېژندنې ليدنه وکړه .
په خبرپاڼه کې راغلي، چې ولسمشر جنرال ډنفورډ ته د ښه راغلاست ترڅنګ د هېواد د وضعيت په اړه رڼا واچوله او په ډاګه يې کړه، چې ده ته په افغانستان کې د امريکايي ځواکونو د قوماندان په حيث په کومه اندازه ستر او پراخه کارونه مخکې دي.
حامد کرزي په دې کتنه کې وويل، چې افغان دولت ته د امنيتي مسووليتونو لېږد، د افغانستان او امريکا متحدو ايالتونو ترمنځ امنيتي قرارداد او بالاخره په راتلونکي کې په افغانستان کې د امريکايي ځواکونو شتون، هغه مهمې او سترې چارې دي، چې دواړه هېوادونه يې مخکې لري.
هغه يو ځل بيا تينګار وکړ، چې افغانان به د دغو يادو مسايلو پر وړاندې د يوه حاکميت لرونکي ملت په توګه تصميم ونيسي او له امريکا نه په دې برخه کې د ټولو مسايلو په اړه د بشپړ درک او همکاريو تمه لري.
سرچينې ليکلي، چې جنرال ډنفورډ له ولسمشر نه د مننې ترڅنګ واشنګټن ته د افغان ولسمشر وروستي سفر ته په اشارې سره د دواړو هېوادونو ترمنځ اړيکې ښې وبللې او د خپلو راتلونکو کاري پلانونو په اړه يې ولسمشر ته خپل معلومات وړاندې کړل.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن