کابل ګردېز (پژواک، ٣١ زمرى ٩٤): په کابل کې د خپلواکۍ د بېرته اخيستو د ورځې په وياړ او په ګردېز ښار کې د نښتر دوديزې مشاعرې ترسره شوې چې په کې سلګونو شاعرانو او مينه والو ګډون کړى و.
په کابل کې د خپلواکۍ د ورځې په وياړ مشاعره د "افغان ادبي بهير" او "ميډيوټيک افغانستان" له خوا د ميډيوټيک افغانستان د دفتر په انګړ کې جوړه شوې وه چې په کې د افغان ادبي بهير لسګونو غړو، ليکوالو او شاعرانو برخه اخيستې وه .
د ميډيوټيک افغانستان يوه غړي محمدعاطف فقيرزاده په خپلو خبرو کې وويل چې شاعران تر ټولو زيات له خپلواکۍ سره ډېره مينه لري او د خپلواکۍ د محدوديت پر وړاندې خپل غبرګون د شعر په ژبه څرګندوي چې د ولس د ويښتيا لامل ګرځي.
هغه زياته کړه چې افغان شاعران د جګړو او ناخوالو تر سيوري لاندې بيا هم د مينې، ښکلا او سولې شعرونه وايي او د خپلواکۍ په معنوي ارزښت ښه پوهېږي چې په دې مشاعره کې يې ګډون غوره بېلګه ده.
په مشاعره کې ګڼو کسانو خپل شعرونه وويل چې عمومي منځپانګه يې بيا هم په يوه ډول د افغانستان د روانو ناخوالو هنري انځور، د جګړې غندنه، د سولې اړتيا او د خپلواکۍ په ساتلو کې د شاعر د رول په اړه وه.
د غونډې يوه ګډونوال او ليکوال احمدجاوېد صديقي پژواک خبري اژانس ته وويل چې په مشاعره کې ويل شوي شعرونه شعارونه نه، بلکې شعرونه وو.
صديقي زياته کړه: ((ځوان شاعران ښکلي شاعري کوي، پخوا به چې داسې کومه مناسبتي مشاعره وه، نو ټولو به يوې موضوع ته شعر وايه، خو اوس هر اړخيز مناسبتي انځورونه لري او شاعر ځان نه محدودوي.))
هغه پر دې مشاعره نيوکه وکړه چې ښځينه شاعرانو په کې ونډه نه وه اخيستې، په داسې حال کې چې د افغانستان خپلواکي د زرګونو نارينه وو تر څنګ د افغان نجونو او مېرمنو د هوډ او مبارزې پايله ده.
د يادونې ده، سږ کال د افغانستان د خپلواکۍ د بېرته اخيستلو ٩٦ کاليزه د نورو کلونو په پرتله په ګڼو ولايتونو کې په درنو او پرتمنيو مراسمو ونمانځل شوه.
د يو بل خبر له مخې، د پکتيا ولايت په مرکز ګردېز ښار کې هم د نښتر دوديزې مشاعرې د لسو کلونو بشپړېدو په وياړ لويه مشاعره ترسره شوه چې په کې د پکتيا سربېره د کابل، ننګرهار، لوګر، ميدان وردګو، خوست او يو شمېر نورو ولايتونو شاعرانو او د ادب مينه والو په کې برخه اخيستې وه.
دغه مشاعره چې د پکتيا ولايت مقام له لوري د پکتيا له فرهنګيانو سره په ګډه جوړه شوې وه،د ګردېز د نوي ښار د جرګو په تالار کې د جمعې په ورځ سهار په نهو بجو پيل شوه او د ماسپيښين تر يوې بجې پورې يې دوام وکړ.
د اطلاعاتو او کلتور وزير عبدالباري جهاني په لېږل شوي پيغام کې د نښتر مشاعرې د لسمې کليزې مبارکي وويل شوه او د دې ډول مشاعرو د ارزښت په اړه يې خبرې وکړې.
د پکتيا والي نصرت ارسلا مېلمنو ته د ښه راغلاست تر څنګ له هغوی مننه وکړه چې له لرې ولايتونو راغلي او خلکو ته د سولې پيغام وړاندې کوي.
نوموړي زياته کړه چې شاعران او ليکوالان د خلکو او ټولنې په راويښولو کې ستره ونډه لري او په تېرو څو کلونو کې يې د خپلې ژبې او کلتور په بډاينه کې زيات کار کړی دی.
ارسلاوويل چې تر خپل وسه پورې به لا هم په راتلونکي کې دې ډول ادبي پرګرامونو ته دوام ورکوي.
مشاعرې ته راغلو شاعرانو تر ډېره هنري او له حالا تو سره سم د خلکو د ويښولو په تړاو شعرونه وويلچې د خلکو د خوښي وړ وګرځېدل.
په مشاعره کې د غزلونو تر څنګ، ترنم،طنزي شعرونو او نورو برخو ته په کې ځای ورکړل شوی و چې غونډې ته يې لاه ښکلا ور بښلې وه.
د ننګرهار د اطلاعاتو او کلتور رييس اورنګ صميم پژواک خبري اژانس ته وويل دا يې لومړی ځل دی چې پکتيا ته راغلی او ډېر خوشاله دی چې په دغه ولايت کې ځوانانو او فرهنګيانو د شعر او ادب په برخه کې ډېر ښه پرمختګ کړی دی .
نوموړي وويل هيله مو دا ده چې په راتلونکي کې هم دا ډول ادبي غونډو ته ادامه ورکړل شي تر څو د اداب او فرهنګ په غوړېدا کې کار وکړي.
د نښتر کلنۍ مشاعرې بنسټ لس کاله وړاندې د پکتيا د فرهنګيانو او د ادب مينه والو له لوري په پکتيا او د جرمني هېواد د مونشن په ښار کې کېښودل شو چې هر کال د نورو ولايتونو د فرهنګيانو په ګډون په دوو هېوادونو کې په پرله پسې ډول لمانخل کېږي.
د دې مشاعرې مالي لګښت د ولايت مقام، ملي سوداګرو او د ادب د مينوالو له لوري ورکول کېږي .
غړيYou need to subscribe to view the full article. Please login or register a new account.
