کابل(پژواک، ٢٩ وږى ٩٤): د سولې شورا د پخواني مشر استاد برهان الدين باني د وژل کېدو د څلورم تلين په مناسبت ، د کابل ښار په وزير اکبرخان غونډۍ کې د نوموړي پر قبر د ګلونو ګېدۍ ايښودلو مراسم تر سره شول .
استاد رباني د ١٣٩٠ لمريز کال د وږي په ٢٩ مه ، ماښام د يوه ځانمرګي له خوا چې ويل کېدل د طالبانو د سولې پيغام راوړونکى دى، د کابل ښار په وزيرمحمد اکبرخان مېنه کې په خپل کور ووژل شو او د تلې مياشتې په لومړۍ نېټه د يو لړ مراسمو په ترڅ کې په کابل کې خاورو ته وسپارل شو.
له دې پېښې وروسته ملي امنيت او د کورنيو چارو وزارت اعلان وکړ چې ځانمرګى بريدګر پاکستاني وګړى و او ددې بريد پلان هم په کوېټه ښار کې طرحه شوى و.
د کابل ښار په وزيراکبرخان غونډۍ کې د استاد رباني په قبر د ګلونو د ګېډۍ ايښودلو مراسم نن سهار(٢٩وږى) د دولت د لوړ پوړو چارواکو له خوا تر سره شول.
په دې مراسمو کې د بهرنيو چارو وزير او د استاد رباني زوى صلاح الدين رباني، په اصلاحاتو او غوره حکومتوالۍ کې د ولسمشر فوق العاده استازي احمدضياء مسعود، د ولسمشر دويم مرستيال محمد سرور دانش او د ملي دفاع وزارت سرپرست معصوم ستانکزي ګډون کړى و.
په دې مراسمو کې د استاد ربانې کورنۍ، ځينو لوړ پوړو حکومتي چارواکو، د ملي شورا او سولې شورا غړو ګډون کړى و.
د پخواني شوروي اتحاد پر وړاندې د جهاد او د جمعيت اسلامي ګوند د مشر استاد رباني د وژلو کاليزه په رسمي مراسمو سره د هېواد په مرکز او ولايتونو کې نمانځل کېږي.
د وزيرانو شورا د يوه حکم له مخې استاد ربانې ته د درناوي لپاره له سر له دې کاله د وږې ٢٩مه عمومي رخصتي اعلان کړې ده.
login or register a new account.
