هغو دولتي چارواکو چې خپلې شتمنۍ نه دي ثبت کړي، نومونه به يې په ډاګه شي

کابل (پژواک ٢٩ لړم٩٥): د اداري فساد پر وړاندې د مبارزې اداره، په دې خبرې د ټنيګار ترڅنګ چې له اداري فساد سره مبارزه ملي اجماع ته اړتيا لري، وايي چې د هغو يو شمېر لوړپوړو دولتي چارواکو نومونه چې خپلې شتمنۍ يې تر اوسه نه دي ثبت کړې، په ډاګه کړي.

له اداري فساد سره د مبارزې ادارې سرپرست سيدغلام حسين فخري، نن په کابل کې په خبري ناسته کې وويل، د فساد د شومې پديدې د له منځه وړلو لپاره د وزارتونو او دولتي ادارو چارواکي بايد د فساد له منځه وړلو په برخه  کې له يادې اداري سره همکاري وکړي.

نوموړي له اداري فساد سره د مبارزې لړۍ يو اوږدمهاله کار وباله او ويې ويل: "له يادې شومې پديدې سره مبارزه، د يوه يا څو بنسټونو کار نه دى، ترڅو چې خلک له موږ سره د اداري فساد له منځه وړلو کې همکاري ونه کړي، د اداري فساد موضوع يواځې د فرمانونو په صادرولو، حکم او لارښوونو سره کومه پايله نه لري."

له اداري فساد سره د مبارزې ادارې سرپرست وويل، دولت بايد په حکومتولۍ کې د اصلاحاتو په برخه کې، چې روڼتيا، اداري اصلاحات، دولتي مامورينو ته د ژوند د اسانتياوو برابرول، بيمه او معاش په کې شامل دي، داسې ګامونه پورته کړي، څو له اداري فساد سره مبارزه يوه پايله ولري.

نوموړي د دې خبرې په څرګندولو سره چې د دوى اداره له اداري فساد سره د مبارزې عدلي او قضايي مرکز سره نږدې اړيکه لري، وويل: "تراوسه پورې ياد مرکز ته اته دوسيې سپارل شوې او په نږدې راتلونکي کې يو شمېر نورې دوسيې هم د عدلي او قضايي مرکز ته لېږل کېږي."

له اداري فساد سره د مبارزې مشر وايي، ډېر ژر به د هغو لوړپوړو دولتي چارواکو نومونه په ډاګه کړي، چې خپلې شتمنۍ يې نه دي ثبت کړې.

هغه وويل: "فهرست د چمتو کېدو په حال کې دى، کله چې بشپړ شو، نو نوملړ به ولسمشرۍ ماڼۍ ته ولېږي، د ماليې وزارت، د اطلاعاتو او فرهنګ وزارت او له رسنيو سره به شريک کړو او د يو شمېر ډېرو جدي او پرمختللو مواردو چوکاټ لويې څارنوالۍ ته هم ولېږي، څو په اړه يې لويه څارنوالي پرېکړه وکړي."

بلخوا د اطلاعاتو او فرهنګ وزارت، د خلکو او وزارت د کارکوونکو د عامه پوهاوي په اړه له فساد سره د مبارزې ادارې سره د مطبوعاتو له لارې يو هوکړه ليک هم لاسليک کړ.

دغه هوکړه ليک نن د اطلاعاتو او فرهنګ وزارت د سرپرست سيدکمال سادات او له اداري فساد سره د مبارزې سرپرست سيدغلام حسين فخري ترمنځ په کابل کې لاسليک شو.

سيدکمال سادات د هوکړه ليک د مراسمو پر مهال وويل، د دغه هوکړه ليک پر بنسټ به په ټول هېواد کې دولتي کارکوونکو او عامه خلکو ته د اداري فساد پر وړاندې د مبارزې عامه پوهاوى پيل کړي.

سادات وويل: "پخوا مو له اداري فساد سره د مبارزې په برخه کې کوم هوکړه ليک نه درلود، خو بيا هم د خلکو د پوهاوي په برخه کې هلې ځلې شوې، خو د ياد هوکړه ليک له لاسليک وروسته به په ټولو اړخونو کې خپلې همکارۍ زياتوي."

له اداري فساد سره د مبارزې ادارې مشر سيد غلام حسين وويل، د اطلاعاتو او فرهنګ وزارت د خپرونو په برخه کې ډېر امکانات لري او له اداري فساد سره د مبارزې په برخه کې خلکو ته ډېر اطلاعات او معلومات ورکولى شي.