ترینکوټ (پژواک، ۲۱ لړم ۱۴۰۳): اروزګان ولایت کې د اتو لوبډلو ترمنځ د فوټبال غوره لیګ سیالۍ پیل شوې چې یوه میاشت به دوام وکړي.
د اروزګان د فوټبال فدراسیون مسوولین وايي چې په دغه ولایت کې یې نن د اتو لوبډلو ترمنځ د فوټبال سیالۍ پیل کړې چې د لیګ په بڼه به ترسره شي او یوه میاشت به دوام وکړي.
د یاد فدراسیون مشر میرزامحمد امیرزي وویل: «د دې سیالیو لومړی مقام ترلاسه کېدونکې لوبډله به د ۲۰۲۴ کال اتله لوبډله اعلانېږي او د ولایت په استازولۍ به د هېواد په کچه سیالیو کې برخه اخلي.»
ورته مهال، په دې سیالیو کې برخه اخیستونکي لوبغاړي خوشحاله دي او غوښتنه کوي چې د دې ډول سیالیو ترسره کول دې ډېر شي.
د میوند لوبډلې یوه لوبغاړي عصمتالله وویل: «هیله لرم چې یادې سیالۍ وګټو او د هېواد په کچه د اروزګان استازولي را په برخه شي.»
دا لوبې د ترینکوټ ښار د فوټبال په مرکزي لوبغالي کې ترسره کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP