بلخ کې د سینما لوبغاړي خپلې هنري برخې ته د دولت پاملرنه غواړي

مزارشريف (پژواک، ۸ مرغومی ۹۵): د بلخ ولايت سينمايي لوبغاړي د خپلو هنري طرحو د عملي کېدو او توليد لپاره له دولته د جدي پاملرنې او ملاتړ غوښتنه وکړه.

د بلخ په مرکز مزارشريف ښار کې د مرغومي په ۸مه لسګونو سينمايي لوبغاړو د سينمايي هنر نړيواله ورځ ونمانځله.

سينمايي لوبغاړي شفيق سروري د يادې غونډې په څنډه کې پژواک خبري اژانس ته وويل چې د دولت د نه پاملرنې له امله يې موده وشوه چې له سينمايي هنر سره يې فاصله پيدا شوې ده.

نوموړي زياته کړه چې دوی د نندارو وړاندې کېدو او فلمونو جوړېدو لپاره خورا ښې طرحې لري؛ خو د عملي کېدو لپاره يې امکانات نشته.

هغه وويل: ((دولت ګرم دی چې له موږ سره مرسته نه کوي، د سينما هنر په نوره نړۍ کې د عوايد په برخه کې له دولت سره ډېره همکاري کوي؛ خو زموږ دولت دې برخې ته هېڅ پاملرنه نه ده کړې.))

د ماه تلاش په نوم د بلخ ښځينه سينمايي لوبغاړې پژواک ته وويل چې د کورنۍ ډېر غړي يې د سينما هنر پالي.

نوموړې بيا ټولنيزې ستونزې د خپلې کورنۍ او سينمايي هنر پالنې پر وړاندې خنډ وبللې.

هغه وايي چې ډېر وخت په لارو کوڅو او عامه ځايونو کې یې د ځوانانو لوڼې په دې تور ځورول کېږي چې فلمونو کې کار کوي.

په بلخ کې د افغان فلم مسوول صادق سرورزاده دولت له سينمايي چارو سره پر نه همکارۍ تورن کړ.

هغه له ملي سوداګرو هم شکايت درلود چې د سينمايي چارو په برخه کې پانګونه نه کوي.

نوموړي په بلخ کې د سينمايي چارو د ترسره کولو پر وړاندې د شته ستونزو په تړاو وويل چې د خپلو جوړو شوو فلمونو لپاره يو تالار هم نه لري.

د بلخ ولايت د اطلاعات او فرهنګ مسوولينو د سينمايي هنر لپاره کار کول ضروري وګڼل؛ خو په دې برخه کې يې د بوديچې نشتوالي جدي ستونزه وګڼله.

د ياد رياست مرستيال عطامحمد ساهو پژواک ته وويل چې په ټوله کې دوی د سينمايي هنر په برخه کې د کار کولو لپاره په عملي توګه بوديجه نه لري.

خو نوموړي زياته کړه چې دوی د سينمايي چارو او د سينمايي لوبغاړو تر منځ د همغږيتوب په برخه کې کارونه ترسره کړي دي.

غړي

You need to subscribe to view the full article. Please login or register a new account.