لښکرګاه (پژواک،۱۳مرغومی۹۵): په هلمند کې د ميوند قول اردو قوماندان وايي، د هلمند-کندهار لويه لار طالبانو نه، بلکې دوى د عملياتو په ترڅ کې خلاصه کړې ده.
خو وسله وال طالبان بيا وايي، دغه لاره طالبانو د يوې مودې لپاره د ملکي خلکو د اړتياو د پوره کېدو په موخه خلاصه کړې ده.
په هلمند کې د ٢١٥ ميوند قول اردو قوماندان بريد جنرال ولي محمد احمدزي د مرغومي په ١٣مه د خبري غونډې پرمهال وويل، د هلمند-کندهار لويه لاره طالبانو په خپله خوښه د ترافيکو پرمخ نه ده خلاصه کړې.
د ده په وينا، دغه لاره د امنيتي ځواکونو د پرله پسې عملياتو په ترڅ کې خلاصه شوې ده.
هغه وايي: ((موږ هیڅکله د وسله والو طالبانو ضرب الاجل نه منو، دغه لاره به هیڅکله هم بنده نه شي او نه هم طالبانو په خپله خوښه خلاصه کړې ده، دا لاره د عملیاتو په ترڅ کې د امنیتی ځواکونو له خوا خلاصه شوې ده.))
وسله وال طالبان هم د هلمند-کندهار لويې لارې خلاصېدل تاييدوي.
د دې ډلې وياند قاري يوسف احمدي پژواک ته وويل، دغه لاره طالبانو په خپله خوښه د شلو ورځو لپاره يواځې د ملکي خلکو پرمخ خلاصه کړې ده.
د نوموړي په خبره، له تېرې يوې اونۍ راهيسې طالبانو دغه لار د افغان ځواکونو د اکمالاتو د مخنيوي په موخه تړلې وه.
دى وايي: ((دغه لاره د خلکو د غوښتنو پر اساس خلاصه شوه، ترڅو ملکي خلک په دې موده کې خپلې اړتياوې پوره کړي.))
احمدي زياتوي، له دې مودې وروسته به د هلمند-کندهار لويه لاره د تل لپاره وتړل شي او هېچا ته به بيا د تګ راتګ اجازه نه ورکول کېږي.
په وروستيو درېيو مياشتو کې په هلمند کې د امنيتي ځواکونو او طالبانو ترمنځ پرله پسې جګړې وشوې.
په دې جګړو کې وسله والو طالبانو د مرکز لښکرګاه د ځينو سيمو ترڅنګ څو ولسوالۍ هم ونيولې.
هلمند ١٣ ولسوالۍ لري چې شپږ يې له وسله والو طالبانو سره دي او د ځينو يې يواځې مرکزونه له حکومت سره دي.
غړيYou need to subscribe to view the full article. Please login or register a new account.
