کابل(پژواک،٢٨زمرى٩٦): د ملا رسول په مشرۍ د وسله والو طالبانو ډلې د هيواد د خپلواکۍ د ٩٨ يمې کليزې مبارکې و ويله او ټينګار يې وکړ چې نور بايد افغان وژنه بنده شي.
دغه څرګندنې په هغه اعلاميه کې شوي چې د زمري ٢٨مه د ملا رسول ډلې له لوري پژواک خبري اژانس ته را ليږل شوې ده.
په اعلاميه کې راغلي چې د زمري ٢٨مه د افغانستان لپاره د خوشحالۍ او وياړونو ډکه ورځ ده ځکه په دغه ورځ افغانانو د نړۍ سترځواک ته ماتې ورکړه او خپله ازادي يې ترلاسه کړه.
په اعلاميه کې پر بهرنيو ځواکونو غږ شوى چې خپل سرتيري بايد له افغانستان نه نور وباسي او د افغان وژنې لړۍ بايد نوره ودرول شي.
په خبرپاڼه کې راغلي چې په افغانستان کې د بهرنيو سرتيرو ډيروالى نشي کولاى ستونزه هواره کړي.
سرچينې ټينګار کړى چې افغانان بايد پريښودل شي ترڅو خپل ستونزه په خپله هواره کړي.
د يادونې وړ ده چې د وسله والو طالبانو يوه ډله د ملا محمد رسول او بله يې ډله يي د ملا هبت الله تر رهبرۍ لاندې فعاليت کوي.
دا په داسې حال کې ده چې ډيرى وخت د دې دواړو ډلو ترمنځ وسله والې نښتې هم کيږي او يو بل ته مرګ ژوبله اړوي.
افغانانو د غازي امان الله خان په مشرۍ وروسته له ډېرو سرښندنو د ١٢٩٨ کال د زمري په ٢٨ مه له انګريزانو د هېواد خپلواکي بيرته ترلاسه کړه.
پخوا به دا ورځ په شاندارو مراسمو سره نمانځل کېده، خووروسته له هغه چې په ١٣٨٧ کال کې د مجاهدينو د بري ورځې (ثور اتمه) د نمانځلو پر مراسمو وسله وال بريد وشو، حکومت د خپلواکۍ دغه ورځ هم په لنډ ډول نمانځي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن