په ننګرهار او زابل کې وسله والو او پوليسو ته مرګ ژوبله اوښتې

جلال اباد- کلات (پژواک، ٣ تله ٩٦): چارواکي وايي چې په ننګرهار او زابل ولايتونو کې لس وسله والو او دوو پوليسو ته مرګ ژوبله اوښتې ده.

د ننګرهار د والي وياند عطاءالله خوږياڼي د تلې په ٣مه پژواک خبري اژانس ته وويل چې بهرنيو ځواکونو تېره ورځ  ناوخته د هسکې مېنې ولسوالۍ د نرۍ اوبو په سيمه کې بريد کړى دى.

هغه زياته کړه، په دغه بريد کې  يو موټر په نښه شوى، چې په کې د داعش پنځه وسله وال وژل شوي دي.

خوږياڼي دغه راز وويل چې وسله والو مخالفينو د حصارک ولسوالۍ پر ځینو امنيتي پوستو بريدونه کړي وو او د پوليسو له کلک مقاومت سره مخ شول.

د نوموړي په وينا چې په دغو بريدونو کې دوه وسله وال وژل شوي، خو پوليسو ته کومه مرګ ژوبله نه ده اوښتې.

د يو بل خبر له مخې، په زابل کې د نښتې پر مهال پوليسو او وسله والو ته مرګ ژوبله اوښتې ده.

د زابل د ارغنداب ولسوال اميرجان الکوزی وايي چې تېره شپه د يادې ولسوالۍ په باغ سيمه کی وسله والو د پوليسو پر پوستو بريدونه وکړل چې وروسته په رامنځته شوې نښته کې پو پوليس او درې وسله وال وژل شوي دي.

هغه زياته کړه چې په دې نښته کې شپږ پوليس او څلور وسله وال طالبان ټپيان شوي هم دي.

د روغتون سرچينې وايي چې دوى ته د پوليسو يو جسد او شپږ ټپيان ور وړل شوي دي.