<p>مزارشريف (پژواک، ۱۶ ليندۍ، ۹۶): د حج او اوقافو مسوولين وايي چې په بلخ ولايت کې ۶۳۵ ديني مدرسې په غير رسمي توګه فعاليت کوي.</p>
<p>د دغه ولايت د حج او اوقافو رياست مسوولينو، نن يو شمېر ديني مدرسو ته جواز ورکولو په وياړ غونډه کې وويل، دوی هڅه کوي پاتې مدرسې هم له دولت سره رسمي کړي.</p>
<p>نن په همدې تړاو د روضې په جومات کې غونډه جوړه شوې وه چې ۳۰ فعالو ديني مدرسو ته په کې د دولت رسمي جوازونه ورکړل شول.</p>
<p>د بلخ د حج او اوقافو رياست د ديني مدرسو د ثبت پروسې مسوول مولوي امرالدين پژواک خبري اژانس ته وويل، له يادو مدرسو سره په بلخ کې د راجستر شويو مدرسو شمېر ۶۵ ته ورسېد.</p>
<p>نوموړي زياته کړه، لا هم په بلخ کې ۶۳۵ ديني مدرسې د دولت له رسمي جواز پرته فعاليت کوي.</p>
<p>د حج او اوقافو رييس محمد دانشجو پژواک ته وويل، له تېرو دوه کلونو يې په دغه ولايت کې د فعالو ديني مدرسو د ثبتېدو پروسه پيل کړې ده.</p>
<p>نوموړي يې تر دې دمه د ټکنيتوب لامل د دولت او مدرسو تر منځ د اعتبار نشتوالي وښود.</p>
<p>د هغه په وينا، د دوی کارمندان هڅه کوي چې ديني عالمانو او د مدرسو مسوولينو ته قناعت ورکړي، چې دغه چاره يې په ګټه ده.</p>
<p>بلخوا ديني عالمان له دولت سره د ديني مدرسو ثبتېدل، د دواړو اړخونو لپاره ګټور بولي.</p>
<p>ديني عالم محسن دانش وويل، لا هم وېره شته چې د دولت وسله وال مخالفين به له دغه ډول ديني مدرسو څخه د دولت په خلاف ګټه پورته کوي.</p>
<p>نوموړي زياته کړه، له ثبتېدو وروسته به د دولت دغه ډول شکونه هم له منځه لاړ شي.</p>
<p>هغه همداراز د ثبتېدو چاره د مدرسو لپاره هم ګټوره وبلله.</p>
<p>مولوي دانش وويل، زده کوونکو ته به يې د دولت رسمي فراغت سندونه ورکړل شي، چې له حقوقو به يې ښه ګټه واخيستلی شي.</p>
<p>نوموړي همداراز زياته کړه، د ثبتېدو له لارې به مدرسې د دولت ه خوا له ځينو امتيازاتو برخمنې شي.</p>
