لښکرګاه (پژواک، ۲۷ لیندۍ ۹۶): د هلمند امنيتي چارواکي وايي چې په نادعلي ولسوالۍ کې د افغان امنيتي ځواکونو او طالبانو تر منځ جګړه کې ٣٠ طالبان وژل شوي او اووه نور ټپيان شوي دي.
د هلمند د امنيې قوماندانۍ وياند دويم څارن عبدالسلام افغان د ليندۍ په ٢٧مه پژواک خبري اژانس ته وويل چې افغان امنيتي ځواکونو په نادعلي کې ځمکني او هوايي عمليات کړي دي.
هغه وايي چې په دغو عملياتو کې تر اوسه د دوو قوماندانو صوفي خالد او ملاخيل په ګډون ٣٠ طالبان وژل شوي، اووه ټپيان دي او درې نور ژوندي نيول شوي دي.
د افغان په وينا چې په دې عملياتو کې امريکايي ځواکونه له افغان ځواکونو سره د هوايي بريدونو په برخه کې همکاري کوي.
ده وويل چې په دغو عملياتو کې افغان امنيتي ځواکونو او ملکي خلکو ته مرګ ژوبله نه ده اوښتې.
نوموړى وايي چې د عملياتو پر مهال څلور کلاشينکوفونه، يو ميل راکټ، يوه پايه مخابره او دوه موټرسايکل هم د امنيتي ځواکونو لاس ته ورغلي دي.
دغه راز د هلمند والي حيات الله حيات هم وويل چې ډېر ژر به په نادعلي کې د دوامداره امنيت په موخه نوې پوستې جوړې شي.
والي وويل چې نادعلي ته تازه دمي ځواکونه هم رسېدلي او تر وروستي بريده به هڅه وشي چې د عملياتو پر مهال عامو خلکو ته مرګ ژوبله وانه وړي.
د دې څرګندونو په اړه وسله والو طالبانو تر اوسه څه نه دي ويلي.
خو د دې ډلې وياند قاري يوسف احمدي په خپله ټويټر پاڼه کې ليکلي چې طالبانو د نادعلي ولسوالۍ په شمالاني سيمه کې د ملي اردو دوه سرتېري وژلي دي.
نادعلي د هلمند د نا امنو ولسواليو له ډلې دى چې يواځې مرکز له حکومت سره او پاتې نورې برخې له وسله والو طالبانو سره دي.
غړيYou need to subscribe to view the full article. Please login or register a new account.
