کابل (پژواک، ٨ کب ٩٦): د اطلاعاتو او فرهنګ وزارت د لرغون پېژندنې ادارې مشر، په څو برخو د يادې ادارې له وېش څخه د اندېښنې څرګندولو ترڅنګ وايي، په دغه برخه کې موازي فعاليتونه د هېواد د لرغون پېژندنې چارو ته زيان اړوي.
ميراحمد جوينده دغه اندېښنه په هغو مراسمو کې څرګنده کړه، چې په کابل کې د افغانستان د لرغون پېژندنې ادارې رامنځته کېدو د پنځوسمې کاليزې په مناسبت جوړه شوې وه.
هغه وويل: "د لرغون پېژندنې رياست څو ټوټې دى، يعنې يوه برخه يې د اطلاعاتو او فرهنګ وزارت اړونده ده او بله برخه يې په علومو اکاډمي پورې تړلې، واحده اداره شتون نه لري، په دې اړه هرڅوک په خپل زړه پرېکړه کوي."
د اطلاعاتو او فرهنګ وزارت د لرغون پېژندنې ادارې مشر په وينا، په دغه برخه کې د څو ټوټو شتون او موازي فعاليت د لرغون پېژندنې ادارې د ځوړند حالت لامل شوې او د لرغونو اثارو د قاچاق پر وړاندې د مبارزې په برخه کې يې ستونزې رامنځته کړې دي.
جوينده په ياده ناسته کې د اطلاعاتو او فرهنګ وزارت له سرپرست غوښتنه وکړه، چې ياده موضوع په جدي ډول له ولسمشر سره شريکه کړي، څو د لرغون پېژندنې ادارې لپاره واحد بنسټ رامنځته شي.
د علومو اکاډمي چارواکو تر اوسه پورې په دې اړه څه نه دي ويلي.
د اطلاعاتو او فرهنګ وزارت سرپرست رسول باوري وويل، لرغوني اثار د يوه هېواد هويت او وياړ وي او بايد د يادو اثارو د ساتنې او خونديتوب لپاره په جدي توګه پاملرنه وشي.
نوموړي د لرغون پېژندنې ادارې د مشر اندېښنې په اړه نظر وړاندې کړ، خو څرګنده يې کړه، په وروستيو پنځو لسيزو کې افغانستان کې د جګړې او ګډوډيو له امله د هېواد ٧٠ سلنه تاريخي اثار غلا شوي، چې له يادې اندازې يې ډېر کم شمېر ترلاسه شوي دي.
د باوري په وينا، هېواد کې د لرغونو اثارو قاچاق کوونکي نه مجازات کېږي او دغه اثار چې د هېواد هويت په ډاګه کوي؛ په بې رحمانه ډول قاچاق کېږي او تر دې چې زورواکو د هېواد د تاريخي ځايونو له خښتو ځانونو ته کورونه جوړ کړي دي.
د يادولو ده چې په ياده ناسته کې د هېواد د تاريخي او لرغونو اثارو د اهميت په اړه د ولسمشر محمد اشرف غني پيغام هم ولوستل شو.
ولسمشر غني په دغه پيغام کې وويل: "زموږ لرغوني اثار چې زموږ پانګه ده، بايد د دښمنانو له منګولو وژغورل شي او زموږ د تاريخي فرهنګ د ژوندي ساتلو لپاره پرې څېړنې وشي."
خو د حکومت اجراييه رييس عبدالله عبدالله هم په هغه پيغام کې چې په ياده ناسته کې ولوستل شو، ويلي چې خونړۍ جګړې او لرغون پېژندنې رياست ته د حکومت د چارواکو نه پاملرنه د دې لامل شوې، څو ياد رياست په اړونده برخه کې غوره لاسته راوړنې ونه لري.
login or register a new account.
GET IN TOUCH
NEWSLETTER
SUGGEST A STORY
PAJHWOK MOBILE APP