لښکرګاه (پژواک،١٣کب٩٦): په هلمند کې د کوکنارو د کښت د مخنيوي لپاره پر کروندګرو د پستې ونو د وېشلو لړۍ پيل شوه.
د هلمند والي حيات الله حيات د کب په ١٣مه په دې اړه جوړه شوې غونډه کې وويل چې د لومړي ځل لپاره د کوکنارو کښت د مخنيوي لپاره په لښکرګاه، ګرشک، نادعلي او ناوې ولسواليو کې د پنځوسو باغونو لپاره د پستې ونو ورکولو لړۍ پيل شوه.
ده زياته کړه، د دې باغونو کروندګرو ته د پستو ونو د ساتنې او پالنې په موخه د څو بهرنيو موسسو او کرنې رياست له لوري مسلکي زده کړې هم ورکول شوې دي.
د هلمند د نشه يي توکو پر وړاندې د مبارزې رييس سيد احمد ورور وويل چې د دې ولايت په زرګونه هکتاره ځمکه کې کوکنار کرل شوي چې يواځې پنځوس باغونه يې بديل نه شي کېداى.
خو د ده په وينا، د پستو د باغونو لړۍ به نورو سيمو ته هم وغځول شي، ځکه د حاصلاتو له پلوه د پستو ونو په دې ولايت کې ښه نتيجه هم ورکړې ده.
د هغه د معلوماتو له مخې، په هلمند، کندهار او اروزګان کې د پستو ونو د ايښودلو لپاره درې ميليونه امريکايي ډالره ځانګړي شوي دي.
د لښکرګاه ښار د کاريز سيمې يوه کروندګر علي ګوهر پژواک ته وويل چې د پستو ونو د پالنې په اړه دوى ته زده کړې ورکړل شوې دي.
د ده د معلوماتو له مخې، هر کروندګر ته د يو جريب ځمکې لپاره د پستې ٦٦ ونې ورکول شوې دي.
د لښکرګاه ښار د بولان سيمې يوه بل کروندګر محمد لعل پژواک ته وويل چې په خپل شخصي لګښت يې د پستو باغ جوړ کړى دى.
هغه زياتوي: ((اووه کاله وړاندې له ايران څخه راغلم، په دې برخه کې مې پوره تجربه درلوده، په نيم جريب باغ کې مې اووه سوه د پستې ونې کېنولې، درې کاله کېږي چې حاصل ورکوي.))
خو دى وايي، په دغه موده کې نه حکومت ورسره مرسته کړې او نه يې هم دى د دې کار له امله هڅولى دى.
هلمند د افغانستان له ناامنو ولايتونو څخه دى چې په ډېرو کرنيزو ځمکو کې يې کوکنار کرل کېږي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن