مزارشريف (پژواک، ۲٣ کب ۹۶): په بلخ کې نوروز جشن ته د چمتووالي کمېسيون د فرهنګي کمېټې مسوولين وايي چې سږ کال به هم د تېرو کلونو په څېر په جشن کې د فعاليتونو ډېره برخه په فرهنګي اړخونو راڅرخي.
بلخوا د مزارشريف اوسېدونکي هم وايي چې د نوروز جشن ته لکه اختر داسې چمتووالی نيسي.
هر کال د وري په لومړۍ نېټه د سيمې په کچه د افغانستان په شمالي ولايت بلخ کې نوروز جشن نمانځل کېږي.
د دغه جشن پيل په مزارشريف ښار کې د حضرت علي کرم الله وجهه پر روضه د جنډې له پورته کېدو کېږي چې د ملي سرود په غږولو او د توپونو په ډزو د زرګونو کسانو پر وړاندې درول کېږي.
دغه جشن ته هر کال د افغانستان له بېلابېلو ولايتونو د زرګونو کسانو پر راتګ سربېره، له بهره هم خلک راځي.
دغه جشن ته د کب له لومړۍ نېټې په هر اړخيز ډول د يو کمېسيون له خوا چمتووالی نيول کېږي چې د فرهنګي کمېټې مسووليت يې د بلخ ولايت د اطلاعات او فرهنګ رييس صالح محمد خليق پر مخ وړي.
نوموړي د کب په ۲۲مه پژواک خبري اژانس ته وويل چې د جشن د فرهنګي اړخ چمتووالی په بشپړېدو دی.
د هغه په وينا، سږنی جشن به هم د تېرو کلونو په څېر پر فرهنګي فعاليتونو ډېر څرخي؛ خو خليق سږ کال د نوو فرهنګي فعاليتونو يادونه هم وکړه.
صالح محمد خليق وويل چې سږ به هم د تېرو کلونو په څېر بېلابېل فرهنګي، ادبي او هنري پروګرامونه وړاندې کړای شي.
ده زياته كړه، چې د كب له ۲۹ مې، به د بلخ پوهنتون په تالار او نورو بېلابېلو ځايونو كې په وړيا توګه د جشن ګډونوال د بېلابېلو سندرغاړو له سندرو خوند واخلي.
د هغه په وينا، په دغو پروګرامونو كې د هېواد د ځينو ولايتونو پر سندرغاړو سربېره ځينو بهرنيو سندرغاړو ته هم بلنه ورکول کېږي.
خليق زياته کړه چې د ځينو فرهنګي او ادبي ناستو تر څنګ نندارتونونه هم په پام كې لري چې د هېواد بېلابېل اديبان، شاعران او انځورګران به په كې ونډه اخلي او خپل هنري اثار به وړاندې كوي.
د نوموړي په وينا، لنډ هنري فلمونه، انځورګري، تصويرونه، كتابونه او د نوروزي خواړه به هم نندارې ته وړاندې کړای شي.
د جشن د فرهنګي کمېټې مسئول خليق وويل چې سږ کال د بلخ ولايت مقام له خوا د مشاعرې، تياتر او موسيقي په نوې بڼه پروګرام هم ترتيب شوی دی.
نوموړي زياته کړه چې په نورو کلونو کې به دغه ډول پروګرام نه وو.
هغه همداراز سږ کال د تېرو کلونو په څېر د جشن په دويمه شپه د اور لوبې ترسره کېدو نندارې تر څنګ د جشن په دويمه ورځ په شاديان دښته کې د سترو بادي بالونو په مرسته هوا ته د خلکو د پورته کېدو لوبې يادونه هم وکړه.
خليق وويل چې سږ کال د دغه نندارې لپاره بشپړ چمتووالی نيول شوی چې په نورو کلونو کې نه کېده.
نوموړي د سمنک، اتڼ او ځينو افغاني کلتور پورې تړلو چارو يادونه وکړه چې د جشن په جریان کې به په رسمي ډول ترسره کېږي.
بلخوا د بلخ ولايت اوسېدونکي نوروزي جشن ته خوښ دي او وايي چې داسې چمتووالي ورته نيسي، لکه د اخترونو لپاره چې نيول کېږي.
د مزارشريف ښار اوسېدونکي طلامحمد پژواک ته وويل چې په بلخ کې له اخترونو هم په نوروزي جشن کې ساتېري ډېره وي.
نوموړي زياته کړه: ((په اخترونو کې ښار تش وي، ټول خلک په کورونو کې وي، يوازې کورونو ته تګ راتګ وي؛ خو نوروزي جشن له ځان سره شور لري.))
د هغه په وينا، له نوروزه دوه ورځې وړاندې خلک ښار ته مخه کوي، د جشن په اوله ورځ ټول خلک ښار ته راوتلي وي، په ښار کې د موټرو په تګ راتګ بنديز وي؛ نو خلک له پياده ګرځېدو خوند اخلي.
طلامحمد وايي چې دغه ډول تفريح ورته ښه ساتېري ده.
د نوروز لپاره د مزارشريف اوسېدونکي د خپلو کورونو سنګارېدو ته هم ډېره پاملرنه کوي.
مدني فعالې نرګس وويل چې دوی د نوروزي جشن لپاره تر خپلې وسې کور جوړوي.
نوموړې زياته کړه: ((د کور ټول خلک نوې جامې کوي، د کور رنګ تازه کېږي، پردې او نور اړخونه يې جوړېږي، بس ټول کوشش دې ته وي چې په جشن کې کور ښکلی ښکاره شي.))
د هغې په وينا، که څه هم د دغه جشن نمانځنه د افغانستان تاريخي ميراث په توګه خپل ارزښت لري؛ خو په اوسنيو حالاتو کې د افغانانو لپاره ښه تفريح هم ده.
نرګس له امنيتي ارګانونو د جشن په سمه توګه د امنيت خوندي ساتلو جدي غوښتنه وکړه.
د نوروز جشن د امنيتي کمېټې مسئول ذبيح اختري وايي چې د تېرو کلونو په پرتله خورا ښه امنيتي پلان چمتو او د عملي کېدو چارې يې پيل شوي دي.
نوموړي ډاډ ورکړ چې د تېرو کلونو په څېر به سږنی جشن هم د امن فضا کې ترسره شي.
غړيYou need to subscribe to view the full article. Please login or register a new account.
