مزارشريف (پژواک، ۲۷ کب، ۹۶): د بلخ په مرکز مزارشريف ښار کې د نوروز جشن په درشل کې سوداګري ښه کېږي.
په دغه ښار کې د وړې او منځنۍ کچې سوداګر وايي، د نوي کال په درشل کې يې سوداګري د ټول کال په پرتله څو برابره ډېرېږي.
هر کال د وري په لومړۍ نېټه د سيمې په کچه د افغانستان په شمالي ولايت بلخ کې نوروز جشن نمانځل کېږي. د دغه جشن پيل په مزارشريف ښار کې د حضرت علي کرم الله وجهه پر روضه د جنډې له پورته کېدو کېږي، چې د ملي سرود په غږولو او د توپونو په ډزو د زرګونو کسانو پر وړاندې درول کېږي.
دغه جشن ته هر کال د افغانستان له بېلا بېلو ولايتونو د زرګونو کسانو پر راتګ سربېره له بهره هم خلک راځي.
د ښار هټۍ وال وايي، په دې شپو ورځو کې يې د کال د نورو ورځو په پرتله کاروبار ښه کېږي.
د روضې ختيځ لور ته د بنجاره پلورنځي هټۍ وال محمد طارق پژواک خبري اژانس ته وويل، چې د مزارشريف ښار اوسېدونکي د جشن نمانځنې لپاره ځانګړي تدابير نيسي، چې له همدې امله يې د دوی پلور ډېرېږي.
د هغه په وينا، په نورو ورځو کې به يې يواځې عادي دوکانداري کېدله، خو له تېرې يوې مياشتې راهيسې يې کاروباره څو برابره ډېر شوی دی.
په دغو شپو ورځو کې د هېواد له نورو ولايتونو هم خلک په ګاډيو کې د اړتيا وړ خوراکي توکو او زينتي اسبابو د پېرېدلو په موخه مزارشريف ښار ته مخه کوي.
محمد اسلم له خپلو درې نورو ملګرو سره له ننګرهار ولايت څخه راغلی او په لاس ګاډي باندې بېلا بېل څيزونه پلوري.
نوموړي پژواک ته وويل: ((ما د پليو او جوارو دانو د نينې کولو ګاډۍ درولې ده، يو ملګری مې د غاړې دسمالونه خرڅوي او يو بل راسره دی، عينکې پلوري.))
د هغه په خبره، دوی هر کال د خپلې سوداګرۍ لپاره د نوروز په شپو ورځو کې مزارشريف ښار ته راځي، له جشن تېرېدو وروسته يوه مياشت نوره هم تېروي او بيا بېرته خپلو سيمو ته ځي او په دې شپو ورځو کې له خپل کاروباره راضي وو.
په جشن کې د برخې اخيستو لپاره له بېلا بېلو ولايتونو زيات شمېر خلک د کب مياشتې له ۲۰مې مزارشريف ښار ته راځي.
له همدې امله د ښار د هوټلونو او شپې خونو کاروبار ورسره د کال د نورو ورځو په پرتله ښه روان وي.
د نصير هوټل مسوول محمد نويد بشري پژواک ته وويل، د ټول کال په پرتله په روانو څلوېښتو ورځو کې ډېر کاروبار کوي.
نوموړي زياته کړه: ((که داسې درته ووايم چې په همدې څلوېښتو ورځو کې د ټول کال پيسې ګټو، نو خندا به درشي.))
د هغه په وينا، د هوټلونو سوداګري په دې وروستيو کې ښه نه ده، خو يواځې د نوروزي جشن په اوږدو کې له نورو ولايتونو راتلونکو مساپرو سره يې تر څلوېښتو ورځو کاروبار ښه وي.
د جشن د نمانځنې د چمتووالي لپاره هر کال په دولتي کچه کمېسيون ګومارل کېږي، چې يوه کمېټه يې د ښار د پاکوالي او ښکلي کېدو او ورسره په دغو شپو ورځو کې د نرخونو د کنټرولېدو دنده لري.
د همدې کمېټې مسوول د مزارشريف ښاروال محمد نصير عيني وويل، د کب له ۱۵مې د ټول ښار د پاکوالي او د روضې شاوخوا د ښکلي کېدو چارو تر څنګ د هوټلونو څار هم روان دی.
نوموړي زياته کړه، دغه څار د هوټلونو د پاکوالي، د خوراکي توکو د کارېدو او د بيو د کنټرول په موخه دی؛ په روانو شپو ورځو کې هېڅوک حق نه لري چې د بازار له نرخه لوړې بيې وکاروي.
ښاروال په دغه برخه کې له خلکو د ملاتړ غوښتنه وکړه چې که له کوم مشکل او غير قانوني کار سره مخامخ کېږي، نو له دوی سره دې په اړيکه کې شي.
د جشن د چمتووالي د امنيتي کمېټې مسوول ذبيح الله اختري وايي، د کب له لومړۍ نېټې د امنيتي پلان د عملي کېدو چارې پيل شوې دي.
نوموړي زياته کړه، په ښار کې د امنيتي حوزو د چارو تر څنګ ځای ځای د تلاشيو لپاره امنيتي ځواکونه په دندو ګومارل شوي او د ګډو ځواکونو له خوا ټول ښار تر څار لاندې دی.
هغه د جشن ګډنوالو ته د امنيت له پلوه ډاډ ورکړ او د پراخ ګډون هيله يې وښوده.
غړيYou need to subscribe to view the full article. Please login or register a new account.
