مزارشريف (پژواک،٥ ورى ۹٧):د بلخ اوسېدونکي او ځينې مدني فعالان وايي چې سږنی نوروزي جشن د تېرو کلونو په پرتله د سياسي کړکېچونو له امله کمرنګه و.
خو د دغه ولايت دولتي چارواکي بيا وايي چې نه يواځې کمرنګه نه و، بلکې د تېرو کلونو په پرتله ښه ترسره شو.
د وري په لومړۍ نېټه د مزارشريف ښار په حضرت علي روضه کې د سخي جنډې په پورته کېدو سره د تېرو کلونو په څېر د نوروز جشن پيل شو.
هر کال د دغه جشن د نمانځنې لپاره د هېواد له بېلا بېلو ولايتونو عام خلک مزارشريف ښار ته راځي او دغه راتګ د کب مياشتې له لومړيو پيلېږي.
خو سږکال د مزارشريف ښار د هوټلونو مسوولين وايي، کاروبار يې د تېرو کلونو په څېر ښه نه و. دوی يې لامل له نورو سيمو مزارشريف ښار ته د خلکو د راتګ کمرنګي بولي.
د روضې ختيځ لور ته د يوه هوټل مسوول محمد نادر پژواک ته وويل، د خپل کاروبار له مخې وايي چې سږني جشن ته د تېرو کلونو په پرتله کم خلک راغلي وو.
نوموړي زياته کړه: ((په تېرو کلونو کې به د حوت له پنځلسمې زموږ د هوټل خونې ټولې ډکې وې، د نويو مساپرو لپاره به مو ځای نه درلود، خو سږکال داسې نه و.))
د هغه په وينا، سږ کال يې د کب تر پايه هوټل کې ټولې خونې په يوه وخت ډکې نه شوې.
د ښار واړه کاروباريان هم وايي چې د تېرو کلونو په پرتله يې سږني جشن کې کاروبار ښه نه و.
محمد رفيق وايي چې له تېرو څو کلونو له کابله مزار ته راځي او دلته عينکې پلوري.
نوموړي وويل چې سږ کال د نوروز په شپو ورځو کې په ښار کې د خلکو ګڼه ګوڼه کمه وه.
رفيق وويل: ((دا نه شم ويلي چې څومره مې سودا کمه کړې، خلک کم و، نو سودا هم ښه نه ده شوې، نورو کلونو کې به داسې نه و، ښار کې به د ګرځېدو ځای نه و، نو موږ به هم خوشحاله وو.))
د نوروزي جشن له ټولو مهم اړخ فرهنګي پروګرامونه وي، خو د مزارشريف ښار فرهنګيان وايي چې د تېرو کلونو په پرتله په ورته پروګرامونو کې د خلکو ګډون کمرنګه وو.
مدني فعال محمد شفيع پژواک ته وويل، چې پروګرامونه د تېرو کلونو په څېر جوړ شوي وو، خو د خلکو د ګډون له اړخه خوندور نه و.
نوموړي زياته کړه، د ولايت مقام له خوا د نوروزي جشن په نامه د شعر او موسيقي شپني پروګرام کې يې برخه اخيستې وه.
د هغه په وينا، سربېره پر دې چې پروګرام کې د بلخ ولايت د پخواني او اوسني والي په ګډون ډېری دولتي چارواکو هم برخه لرله او عام خلک هم ورته ښه خبر شوي وو، خو کم راغلي وو.
مدني فعال احمد جاوېد واک بيا د سږني کال د کمرنګۍ لامل د بلخ وروستي سياسي بدلونونه بولي. نوموړي پژواک ته وويل: ((له کله نه چې د بلخ د پخواني والي او ارګ تر منځ سياسي کشاله پيدا شوه؛ نو د بلخ دغې سياسي اوضاع د بلخ د امنيت په تړاو د خلکو اندېښنې ډېرې کړې.))
د هغه په خبره، له دغې سياسي کشالې سره د بلخ امنيت هم يو څه ګډوډ شو، چې جشن ته له نورو سيمو د خلکو پر راتګ يې منفي اغېز وکړ.
خو نوموړي له امنيتي ځواکونو خوښي وښوده چې د جشن امنيت يې په ښه او سمه توګه خوندي وساته.
له بلې خوا د بلخ د اطلاعاتو او فرهنګ رييس صالح محمد خليق پژواک ته وويل: ((نه يواځې د تېرو کلونو په پرتله سږنی جشن کمرنګه نه و، بلکې لا ښه و.))
نوموړي زياته کړه چې د تېرو کلونو په پرتله په پروګرامونو کې تنوع وه.
هغه د سترو پوکاڼيو په مرسته هوا ته د خلکو د جګېدو لوبې او همداراز د شعر او موسيقۍ بېلا بېلو پروګرامونو يادونه وکړه چې ډېری يې پر پروسږني جشن کې نه وو.
خليق يواځې د اورلوبې د نه کېدو يادونه وکړه چې د ځينو تخنيکي ستونزو له امله يې کېدل ناشوني وبلل.
نوموړي د خلکو د ګډون په تړاو وويل، د تېرو کلونو په پرتله په ښار کې د هوټلونو د زياتوالي له امله د خلکو د ډېر راتګ سم معلومات نه کېږي.
د هغه په وينا، پخوا هوټلونه کم و، نو خلکو ته به هم ځاى کم و. خليق په ټوله کې سږنی جشن د تېرو کلونو په څېر په هراړخيزه توګه ښه وباله.
د وري په لومړۍ نېټه د زرګونو کسانو په ګډون په مزارشريف ښار کې د سخي جنډې په پورته کېدو سره نوروز جشن پيل شو.
د جشن په رسمي مراسمو کې د ولسمشر دويم مرستيال سرور دانش، د ملي شورا او ولايتي شوارګانو ځينو غړو، د بلخ پخواني والي عطامحمد نور، د دغه ولايت دولتي چارواکو او عامو خلکو برخه اخيستې وه.
جشن ته د ګاونډيو هېوادونو قونسلرانو ته هم بلنه ورکړل شوې وه، چې ډېرو په کې ګډون کړی و.
امنيتي چارواکي وايي چې جشن پرته له کومې پېښې د امنيت له پلوه خوندي تر سره شو.
غړيYou need to subscribe to view the full article. Please login or register a new account.
