مزار شريف ( پژواک، ۱۵ چنګاښ ۹۷):د بلخ ولايت د چمتال ولسوالۍ اوسېدونکي وايي چې تېره شپه د دغې ولسوالۍ په مربوطاتو کې د سيمه ييرو پوليسو او ملي اردو څلور پوستې سقوط شوي او يو شمېر سيمې د طالبانو لاسته ورغلې دي.
د بلخ د ولايتي شورا رييس افضل حديد هم وايي چې چمتال کې درې پوستو سقوط کړی او دمګړۍ د ولسوالۍ ودانۍ تر ګواښ لاندې ده.
خو د بلخ ولايت مقام بيا په دغه ولسوالۍ کې يواځې د يوې پوستې سقوط تاييدوي او زياتوي چې د نيولو لپاره يې مرستندوی سرتېري سيمې ته رسېدلي دي.
ځايي خلک وايي چې تېره شپه په جرکلا سيمه کې د سيمه ييزو پوليسو يوه پوسته او د ملي اردو يوه قرارګاه، په ينګي قلعه کلي د سيمه ييزو پوليسو دوه پوستې طالبانو نيولي دي.
د جرکلا سيمې اوسېدونکي حاجي سليمان پژواک خبري اژانس ته وويل چې تېره شپه ۸ بجې طالبانو لومړی په دغه سيمه کې د سيمه ييزو پوليسو پر پوستې بريد وکړ.
هغه وويل چې د يادې پوستې سيمه ييزو پوليسو له جګړې پرته پوسته پرېښوده او شاتګ يې وکړ.
نوموړی وايي چې د دغې پوستې په دوه کيلومترۍ کې د ملي اردو يوه قرارګاه هم موجوده وه، چې له لږ جګړې وروسته سرتېري ترې ووتل او طالبانو ونيوله.
د چمتال ولسوالۍ د ينګي قلعه سيمې اوسېدونکي سيد رحمان اغا پژواک ته وويل چې تېره شپه د دوی په کلي کې هم د سيمه ييزو پوليسو دوو پوستو سقوط کړی دی.
نوموړي زياته کړه چې په دغه سيمه کې د بابه قوشقار په نوم د سيمه ييزو پوليسو پوستې تر سهاره نښته وکړه، خو سهار کې سقوط شوه.
د هغه په خبره، په دغه پوسته کې د امنيتي ځواکونو دوه رېنجر موټر او يو هاموې د طالبانو لاسته ورغلي دي.
نوموړی زياتوي چې د بابه قوشقار پوستې تر څنګ د سلطان محمد خان ژرندې امنيتي پوسته هم طالبانو ته په لاس ورغلې ده.
د چمتال اوسېدونکي وايي چې د يادو پوستو له سقوط سره جرقلعه، ينګي قلعه او مرکزي چمتال پراخې سيمې طالبانو ته په لاس ورغلې دي.
د بلخ د ولايتي شورا رييس افضل حديد پژواک ته وويل چې په چمتال کې درې پوستو سقوط کړی دی.
نوموړي زياته کړه چې دمګړۍ د چمتال ولسوالۍ او امنيه قوماندانۍ ودانۍ له جدي امنيتي ګواښ سره مخ دي.
حديد وويل چې د نښتو په اوږدو کې يو هاموې ټانګ هم طالبانو نيولی دی.
هغه په بېړني ډول سيمې ته د مرستندوى ځواکونو د استولو غوښتنه کوي.
خو د بلخ ولايت مقام مطبوعاتي مسوول منير فرهاد بيا په چمتال کې يواځې د جرکلا سيمې د پوستې سقوط خبره تاييدوي.
فرهاد زياتوي چې له يادې پوستې څخه امنيتي ځواکونو تاکتيکي شاتګ کړی دی.
نوموړي پژواک سره په خبرو کې وويل چې سيمې ته يې مرستندوی ځواکونه لېږلي او دمګړۍ هم د طالبانو او امنيتي ځواکونو تر منځ سخته نښته روانه ده.
د سيمې خلکو پژواک ته وويل چې په يادو نښتو کې يو سيمه ييز پوليس وژل شوی،يوبل ټپي دي او څلور تنه د طالبانو له خوا ژوندي نيول شوي.
د بلخ د ولايتي شورا رييس بيا وايي چې د دوی د معلوماتو له مخې، دغلته څلور سيمه ييز پوليس ټپيان شوي دي.
د بلخ سيمه ييز مسوولين بيا په يادو نښتو کې د اوښتو تلفاتو په اړه څه نه وايي.
طالبانو هم تر اوسه پورې په دې تړاو څه نه دي ويلي.
غړيYou need to subscribe to view the full article. Please login or register a new account.
