مزارشريف (پژواک، ١٢ لېندۍ ۹۷): د بلخ ولايت په مرکز مزارشريف کې ښاريان او سوداګر شکايت کوي چې په وروستيو څو ورځو کې د برېښنا پرله پسې پارچاوۍ له ګڼو ستونزو سره مخ کړي دي.
د بلخ ولايتي شورا هم د يادې ستونزې پخلی کوي او د بلخ برېښنا رياست مسوولين د برېښنا په منظم وېش کې پاتې بولي.
خو د بلخ برېښنا رياست بيا په ژمي کې د برق د مصرف زياتېدل د يادې ستونزې لامل بولي.
د مزارشريف د نهمې ناحيې اوسېدونکي محمد اجمل پژواک ته وويل چې له تېرې يوې اوونۍ راهيسې يې ډېری وخت برق نه وي.
هغه زياته کړه چې د تېرو کلونو د ژمي په موسم کې هم برېښنا په نوبت شوې وه، خو د سږ کال په څېر نه وه کمه شوې.
اجمل زياتوي چې په ۲۴ ساعتونو کې يواځې ۸ ساعته برېښنا ته لاسرسی لري او نور ۱۶ ساعته له برېښنا محروم وي.
هغه ادعا کوي چې له يوې خوا په ژمي کې د برق مصرف زياتېږي او ورسره برېښنا کمېږي، نو له بل لوري د بلخ برېښنا رياست د برق وېش هم د روابطو پر اساس تنظيم کړی.
ده غوښتنه وکړه چې د برېښنا د وېش په برخه کې دې له عدالت څخه کار واخيستل شي.
د مزارشريف ښار د لومړۍ ناحيې اوسېدونکی نجيب الله هم د برېښنا له کمښته شکايت کوي خو د ښار په دې سيمه کې بيا د نهمې ناحيې په پرتله برق زيات دی.
نوموړي زياته کړه چې تېره اوونۍ يې په ۲۴ ساعتونو کې يواځې دوه ساعته د برېښنا پارچاوي ورباندې راتله.
هغه وايي چې د برېښنا له همدې پارچاوۍ بيا هم خلک له ستونزو سره مخ وو.
نجيب الله وويل: ((له يوې خوا ژمی او ساړه له دي او له بل پلوه د برېښنا اړتيا ډېره شوې؛ نو ځکه خلک غواړي چې پارچوي راکمه شي او يا هم که برېښنا رياست يې داسې تنظيم کړي چې لږ تر لږه خلک له ستونزو سره مخ نه شي.))
په مزار شريف ښار کې د برېښنا د کمښت او پارچاوۍ له امله سوداګر هم په اندېښنه کې دي.
د بلخ د سوداګرۍ خونې اجراييوي مدير نصير احمد قاسمي پژواک اژانس ته وويل چې د برېښنا په کمښت او پارچاو کېدو سره صنعتي فابريکو او سوداګريزو مارکېټونو ته هم زيان اوښتی.
هغه لويه ستونزه د برېښنا د پارچاوۍ په برخه کې د منظم مهالوېش نه شتون په ګوته کوي او زياتوي چې د ښار له عادي اوسېدونکو نيولې تر سوداګرو پورې، څوک نه پوهېږي چې څه وخت او په کوم وخت يې برېښنا قطع کېږي.
قاسمي زياته کړه چې د برېښنا په پارچاوۍ سره د توليدي کارخانو د کارونو ټکنيتوب تر څنګ يې ماشينونو ته هم تخنيکي عوارض پيدا کېږي.
هغه وويل: ((توليدي فابريکې ځانته معيارونه لري چې ماشين څه وخت چالان شي او څه وخت خاموش کړای شي؛ خو متاسفانه چې کله توليدي فاريکه فعاله وي او کار پکې روان وي؛ نو په يو ځلي برېښنا لاړه شي او هر څه ورسره ګډوډ شي چې له همدې امله د يو شمېر فابريکو ماشينونو تخنيکي عوارض پيدا کړي.))
د بلخ د سوداګرۍ خونې اجرايوي مدير همدا راز وايي چې سوداګريز مارکېټونه هم د برېښنا د کمښت له امله له تاوان سره مخ دي.
د هغه په خبره سره له دې چې د يادو مارکېټونو خاوندان برېښنا رياست ته د برق ډېره لوړه صرفيه تحويلوي؛ خو بيا هم حکومت نه دی توانيدلی چې د دوی د اړتيا وړ برېښنا پوره کړي.
هغه غوښتنه کوي چې د وارداتي برېښنا کمښت که ستونزه وي؛ نو حکومت او برېښنا رياست بايد په لويو سوداګريزو مارکېټونو کې د جنراتور فعالولو سيستم رامنځته کړي چې سوداګر له شته ناوړه حالت څخه وژغورل شي.
په ورته وخت کې د بلخ ولايتي شورا هم د سوداګرو او عامو ښاريانو ستونزې تاييدوي او د بلخ برېښنا رياست د برق په نامنظم وېش تورنوي.
د ولايتي شورا مرستيال سيد عبدالله مسرور پژواک ته وويل چې په ژمي چې د برېښنا د کمښت موضوع هغومره ستونزمنه نه ده؛ څومره کې د برق د نامنظم وېش له امله مشکلات زيات شوي دي.
هغه زياته کړه چې د ښار په يو شمېر هغو سيمو کې چې لوړ رتبه دولتي چارواکي او شتمن کسان اوسېږي؛ نو هلته د برېښنا ټرانسمېټرې نوې شوي، د برېښنا مزي قوي دي او خلکو ته په کافي اندازه برق رسول کېږي.
خو د هغه په خبره له ښار څخه لږ لرې سيمو او يا هم هغو ناحيو کې چې تر ډېره واسطه دار خلک مېشت نه وي؛ نو هلته هماغه پخواني زاړه مزي او زړې ټرانسمېټرې لګېدلي چې د ډېرې برېښنا د انتقال وس نلري.
مسرور همدا راز وايي چې د مزار شريف ښار په يو شمېر ساحو کې د استوګنو کورونو په زياتوالي سره هم د برېښنا د کمښت ستونزه رامنځته شوې ده.
د بلخ د ولايتي شورا مرستيال زياته کړه چې بار بار يې په مزارشریف ښار کې د برېښنا د منظم وېش په تړاو بلخ برشنا نه غوښتنې کړي؛ خو په وينا يې چې هغوی لا هم دغه کار نه دی کړی.
هغه ټينګار کوي، که د برېښنا د منظم وېش لپاره کار وشي؛ نو برق کم نه دی او په همدې شته برېښنا تر ډېره د خلکو ستونزې حل کېدلای شي.
له دې سره د بلخ برېښنا رياست هم د برېښنا د کمښت په اړه د خلکو او سوداګرو ستونزې مني؛ خو د برق د نا منظم وېش په تړاو شوې ادعاوې بې بنسټه بولي.
د بلخ برېښنا رييس محمد نسيم ګنجي پژواک ته وويل چې هر کال د ژمي په موسم کې د زيات مصرف له امله مزارشريف کې وارداتي برېښنا کمېږي.
نوموړي زياته کړه چې ياد رياست بيا موجودې برېښنا ته په کتو هغه پر خلکو وېشي.
هغه وايي چې په ټوله کې بلخ ولايت شاوخوا ۱۲۰ ميګاواټه برېښنا ته ضرورت لري چې اوس ورته له ۵۰ نيولې تر ۶۰ ميګاواټه برېښنا راځي.
د هغه په خبره د همدې کمښت له امله دوی مجبور دي چې برېښنا وويشي چې له امله يې پارچويانې منځته راځي.
نوموړي د برېښنا د نامنظم وېش په تړاو د ښاريانو د ادعاوو په تړاو وويل: ((موږ د برېښنا وېش په منظم ډول ترتيب کړی؛ خو د پارچاوۍ برخه کې مو اولويتونه ټاکلي دي، د بېلګې په ډول د ښار هغو سيمو کې چې تجارتي مارکېټونه، مهمې عام المنفعه دولتي ادارې، نظامي مرکزونه او د ښوونې او روزنې مرکزونه موجود وي؛ نو برېښنا ډېره ورکوو.
د بلخ برېښنا رييس د تېرې اونۍ د زياتې پارچاوۍ لامل په ازبکستان کې د برېښنا د مزو قطع کېدل ياد کړل چې په وينا يې په تړل کېدو سره يې بېرته ستونزه حل کېږي؛ خو زياتوي چې بيا به هم د برېښنا د کمښت له امله د برېښنا پارچوي موجوده وي.
هغه دا هم وويل چې سوداګريزو مرکزونو او توليدي فابريکو ته د برېښنا رسول ورته لومړيتوب لري؛ خو زياته يې کړه چې کله هم برق له پورته کم وي؛ نو دوی يې ذمه وار نه دي.
نوموړي له مزار ښاريانو غوښتنه وکړه چې د برېښنا د کمښت ستونزې ته په کتو خپل مصارف کم کړي؛ څو دوی دغه شته برېښنا ټولو ښاريانو ته ورسولای شي.
غړيYou need to subscribe to view the full article. Please login or register a new account.
